من الماضي

والقلب به عن لذة النوم تكّاك
لا دك في قلبي من الهم داكوك
جاوبت طربان الحمايم والادياك
عزّي لحالك يا عزيّز وانا ابوك
كان الزمان اللي وطاني توطّاك
على عشير دونه الباب مصكوك
ما غير امرّه واتعداه منّاك
افهم وصاتي يا عزيّز وانا بوك
دامك صغير وغاية العلم يقراك
تراه ما ينفعك خالك ولا خوك
لا صار ما تقضي لزومك بيمناك
وربعك الى بان الخلل فيك عافوك
اقرب قريب لك من الناس يشناك
ان كثر مالك صدقوا لك وطاعوك
وان قلّ ما بيديك شانت سجاياك
لو تطلب الما عندهم كان ما اسقوك
ابعد مزارك عن وطنهم ومرباك
ان جاد حظّك صدقوا لك وزاروك
وان بار كلٍّ ما يبي غير فرقاك
والى اعترض لك من صروف النياصوك
كلٍّ تبرا منك ماهوب ويّاك
وهرّاجة المجلس الى جيت ورّوك
منازلٍ تطرب نظيرك بدنياك
والى قضوا منك اللوازم وخلّوك
تفرقوا وانت احتمل كل ما جاك
كنّك سراج البيت للنور شبّوك
والى قضى الوارد حد الربع طفّاك
والا كما ليمونة الحمض مصّوك
والى قضى منه الطعم فرغوا إلذاك
واللي يجي من رفقته ريب وشكوك
احذر عنه ليّاك تصدق بمسراك
والى جفوك اهل الوطن واستخفوك
قلّع غريسك منه واهدم ركاياك
تراك لو تنجع على الرجل صعلوك
احسن من الي تلتجي له وياطاك
عطهم وضايفهم الى منهم جوك
وغلّق ضميرك لا تعلّم بقصياك
واصحا لخلان الرخا لو تغالوك
اعرف ترى اطيبهم الى احتجت يجفاك
كنّك خوي مقيط دهووك واغووك
وحقك عطاك رشاك واقفا وخلاّك
واحذر عن العيله ترى الحق مدروك
مثل العمل يدركك ما منه فكّاك
وان كان عدوانك على الضيق حدّوك
اخصم طلابتهم بعجفاك وقداك
وان كانهم لمشرّف الحق ماشوك
ناظر مطاليع الفرج قبل مبداك
وان طوعوا شيطان الانفس وهانوك
فاصبر على البلوى ودفنت رزاياك
زرهم تراك الى توانيت زاروك
اما بديت بصاحب السو يبداك
ما دامهم ما طاوعوا لك وعرفوك
اضرب على الكايد الى عمست ارياك
لو هذّبوك من المصايب وضدوك
ما يذبحونك قبل تدني مناياك
واحلم عن الجاهل ترى الحلم مبروك
وقم للضعيف اللي من الضيم ينخاك
وادمح خطا جيران بيتك الى اوذوك
ترى القصير وحرمة الجار بحماك
عطهم رواتب حقّهم لو تناسوك
في كل ما يصلح لدينك ودنياك
وقم للضيوف الى عنوا لك وضافوك
اغلا كرامتهم حجاجك وبشراك
واعرف ترى مالك من الضيف مشروك
لولاه يطلب حاجته فيك ما جاك
وقم للرجال ان ريّعوا لك وحبّوك
واحشم خويك واكرمه عند ملفاك
والى اعتبرت بسيرة الناس كفّوك
ما كثر من شيٍ تعبته وعنّاك
ولا تبات بهم دنياك مضنوك
ما طاب لك ما دام لك وافتهم ذاك
لو يطلبون اخفايك الناس ما اخفوك
والرجل مثل النجم في كل الافلاك
وصلاة ربي عد الاوراق والشوك
ما ناض برّاقٍ وماهل سفّاك
على الذي ما فيه ريب ولا شكوك
محمدٍ مادك بالقلب دكّاك
الشاعر/ سليمان بن شريم - رحمه الله