وش بلاك

اليوم جيتي ياحياتي تشتكين
دامك انتي في بعادك راضية باللي حصل
كنت فاقد إنك انتي يانديه ترجعين
بعد ما شفتك تقولي (باقي إشوي وأمل)
وأنا أضحك من كلامك خابر انك تمزحين
والحقيقه في كلامك شفتك تفك وتحل
قالت أسمع لافقدتك باقي والله هالسنين
أقسم إني ياخصيمي من بعادك ما احتمل
قلت طيب: يوم أنادي ليه أشوفك تبعدين
قالت ورأس أمي لاشراب ولاأكل
ناظر أحوالي وتكلم والبقية عارفين
إن قلبي من فراقك يا ودادي قد رحل
قلت وانا خلق ربي لاماظنك تجهلين
شامخٍ وانا مكاني اذوق من شهد العسل
أدري انك لارحلتي في غيابي تتعبين
ولو أقول اليوم بنسى قلتي بذبح لك جمل
أسمعيني / وأفهميني لانويتي تفهمين
مأقدر ارجع واتناسى لو دموعك تستهل
قالت وربي جيتك فالمهاجر دمعتين
دمعةٍ تنزف عشانك خلها دايم تهل
تدري حنا في زمانٍ بالمحبة مستهين
خلني أقهر زماني لافقدتك يارجل
قلت ابسمح بس عندي ياغرامي كلمتين
( إنتبه.. لالاتكرر.. غلطتك.. لالاتزل))
- عبدالرحمن مازن العطاوي