منتهى حلمي

يا منتهى حلمي وغاية مرادي=متى يكون الحلم عندي حقيقة
متى نشوف العذب ريم البوادي=مقوى على فرقاك لو هي دقيقة
نهبت قلبي وقلت لك شي عادي=بس انتبه ترى المشاعر رقيقة
شاعر مخضرم ملتزم بالمبادي=وثقت فيك ولا كتبنا وثيقة
ما دام بين ايديك نعم الايادي=يفداك شيخ الاضلع المستضيقة
بنيت لك في القلب قصر ونوادي=امر تدلل وادخل اللي تطيقه
لك في الحشا مرسى وروض ومهادي=انا الحديقة وانت ورد الحديقة
انا بدونك جوف سجن انفرادي=رغم اتساع الكون حاسس بضيقة
تكفى وتكفي لا يطول البعادي=والا تولع بالضماير حريقة
كفى تجافي ما يفيد العنادي=بحالة المقهور كوني رفيقة
ليلة وصالك من ليال العيادي=اما فراقك مثل فقد الشقيقة
ما انساك لو قحطان تنسى المهادي=والا العرب تنسى السلوك العريقة
رغم الفراق ولوعتي واضطهادي=من حمد رب الملك ما لي عشيقة
ارسم هدف وارسم هدف في اعتقادي=نكسب ربيع العمر نقطف رحيقه
فادي وافادي وانت فادي وافادي=حتى نعيش العمر باحسن طريقة
وان كان فيك اليوم ضاع اجتهادي=خلك كسبت اثمة ونشفت ريقه
قالت من انت وقلت انا البحر هادي=حذراك تغرق في البحور الغميقة
قالت وانا اسمي تعرفه قلت انادي=قالت تفضل ما في الاسماء سريقة
قلت انتي اللي ساكنة في فؤادي=اسير عندك ضيف وانتي طليقة
انتي في وادي والمولع في وادي=الفرق شاسع والمسافة سحيقة
وانتي من اللي دينهم للعبادي=فيه السماحة عند مبدا الخليقة
ما انتي من اللي صوتها بالروادي=ولا انتي من اللي عاشقة للمسيقة
ما انتي من اللي عقلها غرب غادي=ولا انتي من اللي بالملاهي غريقة
ما انتي من اللي بالمحافل تنادي=الكف بالطيران يسمع صفيقه
ما انتي سميرة لا ولا انتي رنادي=ما انتي حليمة لا ولا انتي فيقة
ما انتي سماهر لا ولا انتي هنادي=ما انتي جواهر لا ولا انتي صديقة
انتي حياة الروح وانتي ودادي=مثل الذهب والماس زايد بريقه
قالت جميلة قلت طبعا وزادي=زاد الجمال ان العباية غليقة
تستر جميع الجسم ماشي بادي=رمز الحماية للفتاة الرشيقة
العولمة ما غيرتها وكادي=بنت الخليج اللي جذوره عميقة
انا افتخر باللي ربت في بلادي=اللي على نهج السلف مستطيقة
اوقف لها تشريف واثنى جوادي=وافرش لها فل الغصون الوريقة
واطلب من المولى عليه اعتمادي=بأمره يلم الشمل بعد الفريقة
لو يعرضون الصافنات الجيادي=غير الخليجيات ما لي طيقة