ملح البحر

يا عيني اللي مطاولها التعب والسهر
تقدح كن الشب والزنجار بهدابها
ويا قلبي اللي من فراق الوليف انصهر
من جور نار الفراق وحر مشهابها
الحب بلوى وفرقى من تحبه قهر
والموت من غيبةٍ ما تعرف اسبابها
لي صاحب غاب وغيابه دهر في دهر
متى من الوصل داري تنبت أعشابها
كنت أحسب أن غيبته يومين ولا شهر
وحسبت الايام لين أخطيت بحسابها
وكتمت سر المحبه لين شعري جهر
وسترت باقي علوم الحب بحجابها
ياشين ملح البحر من عقب عذب النهر
هذاء وذاء مثل وصل الناس وغيابها
يا ضيقة الخاطر أخذي هم قلبي مهر
ليلة فرحنا شقاء والبعد يسعى بها
كم مرة جات ما من صوبها الا الظهر
وحداني الوقت لين اصبحت خطابها
هذا جزاء من بحبك في الخضيراء شهر
وتجاوز اخطر دروب الحب وصعابها
اهديت لك من صميم القلب باقة زهر
وهديتك لي جروح تصعب اطبابها
مشكور يا من غلاك بخافقي ما ظهر
لو غبت روحي تعدك ثالث احبابها
تبقى محبتك في لعماق طول الدهر
مفتاحها في يدي والقفل في بابها
- سالم بن همام