الصمت للملتاع أفضل وسيله

لا وعذاب اللي زمانه تحداه
من وين ما ساق القدم تلتويله
توه شباب ولا كسب شيء يبغاه
ويرجي من الله يرزقه بالجزيله
همه كبير والصبر واصل أقصاه
وعسى بعد صبره يلاقي حصيله
يضيق صدره بس ما ينطق الآه
ويسكت عن الهم الثقيل ويشيله
الصمت من طبعه وهو داه ودواه
الصمت للملتاع أفضل وسيله
والبسمه اللي ما تفارق محياه
يقضي بها أغلب نهاره وليله
يسلى مع الجلاس ويعجبك حكاه
لو كان في صدره همومٍ ثقيله
ما جاته الدنيا على كيف مشهاه
حتى القرابه ما تركوه ف سبيله
أقرب قريبٍ له تفرعن وعاداه
والحظ مايل فوق تسعين ميله
أنا اشهد أنه صابر فوق ما جاه
وأنا أشهد أنه نادر اللي مثيله
أطلب من الله يرزقه ما تمناه
ويفك عوق اللي حياته ذليله
تركي منصور الشرافي - المنطقة الشرقية - الدمام