خالفي سلم العرب

العماس الشوق وقبالك الدلة
خالفي سلم العرب وأقعدي راسي
دلة الرسلان فنجالها والله
لو يجي ويروح مايطرد إعماسي
أنتي اللي تطردين التعب كله
وأنتي أول حلم مايطرده ياسي
ياصباح الورد جوريه وفله
يامسى صدقي مع الناس وإحساسي
جاملي خل ٍ تعب في هوى خله
المجامل بالهوى شي ٍ أساسي
لا تغرك ضحكتي علتي علة
والله إني مأضحك إلا وأنا ناسي
خاطري مكسور والقلب حاصلّه
والمشاعر ليّنة والزمن قاسي
لدّي بعين الرضى وإنسي الزلة
لا تعيدين الجفا والوفا ساسي
جيت لولا قلبي الدرب مادّله
جيت والطرقي والأجواد مقياسي
سلطان مطلق الشتيلي