بعض القصايد

هرجٍ مصفصف ينتشر فالصحافة
يفرح به اللي حط له صورة وشيف
ماهمه المعنى,, كثر كم شافه
يجري ويدفع للبقاله مصاريف
ويشري من الأعداد من شان قافه
فرحان لوكانت هروجه تخاريف
لو تختلط فيها السمان بضعافه
لقا من أصحابه مشجع على الكيف
ومحررٍ اصبح على القاري آفه
الى كتب صفصف له المدح تصفيف
لا,, وأعتبرها للترائي إضافة
ويومين وجاله بالصحافه مشاريف
وحتى المحرر من غلاه استضافه
ولمع سواليفه وسد التجاويف
وسب الزميل وقال شعره خرافه
من شان يبرز بين بعض الملاقيف
وتفرح بشي قال لوهو لقافه
تصفق له الشله وتمدح بتوصيف
هذا عميد الشعر,, يسلم رعافه
بسبقٍ صحافي,, بل بخبطٍ من الهيف
حط المحرر صورته في غلافه
جيلٍ به الشاعر وفيه المناصيف
وأيضا به الفادي سريع النكافه
والخيل تجري,, والردايا مناكيف
ولايعرف المخطين زود الشفافه
والشعر ماينظم بقول العجاريف
وإلاّ بيوتٍ من سمعهن يعافه
الشعر بحرٍ يبهر العين ومخيف
يصعب على السباح ياصل ضفافه
مايقطعه ياكود ربان حريف
ملقنته الأيام علم وثقافه
ماهوب هلباجٍ دفوفه مهاديف
مغتر في نفسه هروجه سفافه
محمد نايف العتيبي
الرياض