العيد عند الشعراء

حل هذه الايام على الامة الاسلامية جميعا ضيف عزيز قريب الى القلوب طالما انتظره الجميع فالكل مشتاق اليه انه العيد,, نعم فرحة العيد وبهجه وأفضل الناس في هذا العيد هو من امتدت يده لصلة ما انقطع الود بينه وبين اقاربه واصدقائه نعم انها ايام لاحلال المحبة محل الشحناء والخلافات كثيرا من القصائد كتبت عن العيد ولكن مشاعر الشعراء تختلف من شاعر الى آخر وها نحن نعرض اليكم بعضا من القصائد التي قيلت عن العيد ولياليه لمجموعة من الشعراء.
* ونبدأ بقصيدة للشاعر الشيخ محمد البراهيم الوافي:
للعيد فرحة وانتظار وهدايا
ويارين يوم العيد بين الاجاويد
يا سيدي يا سيد كل البرايا
احترت اناشا اهديك في ليلة العيد
أهديك قلب هام بين الحنايا
يغرد بحبك له سنين تغريد
والا عيون من سهومك ضحايا
ولا ما تشوف الا انت يا صافي الجيد
والا كفوف تلتهب لك شظايا
من شوقها لك ما تبي باقي الغيد
والا قصيد يرتجف بالشفايا
يسوقه احساسي بليا مواعيد
خذ ما تبي مني ولحلي عطايا
خذ ما تبي يا صاحبي دون تحديد
كلي حلالك يا عقيد الصبايا
آمر تدلل وانت لك كل ما تريد
ياليتني أرضيك واثبت وفايا
ويا علها تعجبك هدية العيد
ويقول الأمير سعود بن بندر يرحمه الله :
اقول في نفسي وانا أعايد الناس
متى بشوفك تكمل افراح عيدي
اجامل وربي عليم بالاحساس
وشهو شعوري وانت عني بعيدي
الى خذاني لك على السهر هو جاس
ماكني الاوسط ربعي وحيدي
لو حسوا بما بي يقولون لاباس
بدال قوله على عيدك سعيدي
لاصرت عندي وقتي اعياد واعراس
حتى لو في وسط سجن الحديدي
والشاعر علي المفضي يقول:
دموع العين هلت فوق خدي
صباح العيد والعالم سعيده
على من كان لي واليوم ضدي
يعاند مثل دنياي العنيده
حبيب ظالم بيح بسدي
تناساني وانا قلبي يريده
الى شفته مع الشارع معدي
اقول القلب هذا يوم عيده
كذلك يقول الشاعر صنيتان المطيري
يا عيد مالك فرحه في عيوني
نسيتني مدري زماني نساني
ما قدرت افراحك تعانق شجوني
احزاني اكبر من كلام التهاني
حاولت اجاري فرحتك وكشفوني
لاجيت ابضحك ما استمرت ثواني
الى أن قال:
يا ليتهم يدرون من غالطوني
ان الهوى ما عاد له عصر ثاني
وياليتهم يدرون من عايدوني
ان الفرح ما له بقلبي مكاني
وقال الشاعر: سلمان عزيز بن مروي:
العيد فرحة وعنه الناس نشاده
يا فرحة العيد لك فالقلب مسكاني
اخص به مملكتنا شعب وقياده
في ظل حكامها ذربين الايماني
في ظل ابو فيصل اللي طور بلاده
وخلا المواطن يعيش بأمن واماني
يادرعنا,, يا ملكنا,, سيد السادة
يا معادي المعتدي ومزين العاني
* نعم لقد استبشر الجميع بالعيد هذا ما قاله نافع البشري
عيد سعيد وبارك الله بالاعياد
اللي جمعتني فيك يا فرحة العيد
يا بسمة تعلن بها الشمس ميلاد
حضور يوم السعد مع سيد الغيد
تعايد الشايب بقبلات الاحفاد
وتضم طفل لاهي يلعب سعيد
نور الفرح ارسلته لحل الاشهاد
والشمس تخفيها ورى فلة الجيد
* وقال عبدالله سعود الصقري في قصيدة
العيد شرف مرحبا حي ذا العيد
عيد رمضان اللي على الحول عايد
عيد سعيد بعد صوم وتحاميد
الله يعيده بالسعد والفوايد
عيد التهجد ولشفع التغاريد
عيد التلاوه والعطا والعوايد
اهدي التهاني والتباريك واشيد
باعلامنا وقلامنا والجرايد
للعالم المسلم جميع الاجاويد
اهل الثناء وقت الرخا والشدايد
وثنى التهاني باشرف القول وازيد
حكامنا آل سعود دروس البدايد
الى ان قال:
كل الوطن عم الفرح والاناشيد
بالعيد يوم النصر والامن سايد
عيد سعيد للعروبة وتجديد
بالدين والدنيا والايمان زايد
مع منهج التوحيد والعلم ونشيد
صرح الحضارة بالوطن كل فايد
* وهذه قصيدة نورة الشبيلي
هلحين صار العيد عندي سعيدي
يوم اهتنى قلبي بشوفة حبيبه
شفت الغلا لي في عيونه اكيدي
بدد سلامه كل شك وريبه
طبع الوفاء عنده وعندي فريدي
قصة عوانا في وفاها عجيبه
الى ان قالت:
يا عيد يا عيد المحبة والاسلام
عساك بالافراح دايم لنا عيد
الله يعيدك بالفرح والرضا التام
والنصر والتمكين وافراحنا تزيد
* ويقول خلف بن سليمان البجيدي العنزي:
اقبل علينا العيد محلا قباله
ياما حلا بالمملكة فرحة العيد
عيدك مبارك يوم مجالي مجاله
يا خادم البيتين يا راعي البيد
لك الولا ولارض في كل حاله
لك يا فهدنا وثنى العلم تأكيد
مولاي شوفك عيدنا وحتفاله
وياليت لو عيدك على كيف ما نريد
ونمسك يمينك ما نعايد بداله
يا عد عمرك عيد وسعيد ويزيد
وزف لصحاب السمو والجلالة
امباركه بالعيد والعيد تجديد
طاعة جميع الشعب له الشكاله
اللي لهم فضل علينا وتوحيد
* وقال سعد مقحم السهلي
العيد عمت فرحته كل الاوطان
ثم اشرقت شمس المحبه سناها
يهدي من الفرحة تغاريد الاوطان
ويرسم على البمسة حلاة شفاها
وحد جميع الناس صدقان واخوان
والنفس وصلها الغالي مناها
كل يقول العيد مبروك يافلان
الله يعيده رب الارض وسماها
ويجمع قلوب عقب فرق وهجران
على الفرح طيب يكسب رضاها
يطيب شوف اللي للأحباب ولهان
نظرات عينه بالمودة ملاها
ويقول عبدالله غازي عيد الحنيني
العيد حان وبالمعاني قصدنا
ببيات من هيض المشاعر مواريد
ابيات من در الجزيلات زدنا
مثل الورود اليانعة بالعناقيد
ابيات في تنظيمهن اجتهدنا
نصوغهن ونعيد ونفيد ونزيد
ابيات نهديهن لقايد بلدنا
اللي على الطولة فعوله محايد
الله يديمك للوطن يا فهدنا
يا سيدي تبقى (واهنيك بالعيد)
ومن قصيدة يخوت المرية
عيدوا بي بالخلا,, والفريق معيدين
كل عذار زينت بالخضاب كفوفها
كن في قلبي سنا نار قوم راحلين
طرفوها بالخلا والهبوب تلوفها
يا جماعة وان عزمتوا على أنكم راحلين
عمفموني عن مظاهيركم لا أشوفها
ومن ابيات قديم الشوق
للعيد فرحة يا حلو فرحة العيد
نشوة آمل في وجيه الاحباب بانت
وللعيد غنوة وابتهاج وتغاريد
في الديرة اللي لسلم الاجداد صانت
وللعيد ذكرى في العيون المساهيد
يوم الجروح الماضية حيل لانت
وللعيد شوق وذكريات وتناهيد
في عيني اللي طول الايام عانت
وللعيد لهفة عن بعض الاجاويد
يوم الطبايع تالي الوقت شانت
وللعيد عقد يلبسه نايف الجيد
ذيك الجفول اللي علىالروح مانت
وهذا الشاعر عبيد بن صمعان يقول هذه الابيات وهو على ظهر السفينة بعيداً عن الوطن:
واهني النزف عيده بالبلادي
في نهار العيد يلبس ثوب خاره
عيدنا بالهير تسمتنا الايادي
لبسنا الشمشول ملبوس وملبوس الخيار
ويقول الشاعر هلال المطيري
ما اقول غير الله يهنيك بالعيد
حقك عليَّ ابادلك بالتهاني
في خاطري والا ترى عيدي بعيد
شوفتك عيدي كان لي عيد ثاني
هذا ابن لعبون يقول في هذه القصيدة
لا تطري الفرقى على المحزون
ما داني الفرقى وطاريها
اربع بناجر بيد المجمول
توه ضحى العيد شاريها
ونختتم رحلتنا هذه مع أبيات عبدالله تركي عبدالله السديري
العيد حل ونجم الاحباب ما هل
اللي بشوفتهم جروحي تشاوت
والموق في لو هو الدمع ما لحل
على البعيد اللي له النفس ناجت
الناس في اعياد وانا جسم منسل
ما عاد بي غير العظام وتلاشت
لولاي اوسع خاطري كل مازل
يوم فرقاه ذا لروح ذابت
يومه نشدني قلت ما نيب انا ادل
ذيك الديار اللي لها النفس عافت
ليته صبر وياي وفي نجد ما مل
ذيك الحزوم اللي لها النفس مالت
الله يوفق صاحبي وين ما حل
ونفسي ترى ما مر يوم وعاجت