ودي بخوتهم

تعاقبن به بين ورد ومصادير
هجسٍ يقفي به والآخر يرده
مثل الورود اللي تعاقب على بير
يا هني مرتاح يحب المخده
ينام ما تطري عليه التفاكير
ما صار له بالبر شف وموده
له سجة بين البلد والغنادير
هذاك مرتاح الضماير وقده
يبيع ديكه بالخميس وعصافير
ما اشتاق ناسٍ للولع مستعده
مكملين ونوهوا للمحادير
ودي بخوتهم وقلبي يرده
قل الزمالة الظروف ومقادير
يا موتري مابك مع البر شده
لا جابوا وقت البراد الصقاقير
لاروحوا مع سهلةٍ مجرهده
ياكود خوتهم على السج والسير
طرد الولع كايد ولا انته بقده
يبي الجيوب مضخمات المواطير
خطو أبيضٍ حول على سيف جده
جديد في درجه جميع التقارير
ريح المراتب فايح تقل نده
وعلى القزازه مثل شخط الطباشير
يازين مركوبه ولونه وشده
عن الغماره ما تزود المواصير
من شان زجرات الهوى ما ترده
ان صار جوه غيم وإلا معاصير
يصلح لطراد الولع والموده
ما يمنعنه عاليات الحمارير
ويصلح لولهانٍ قسا الوقت حده
يجديه لياضاقت عليه المعابير
لا قرب قريب من العرب ما يمده
راع النظر ما يخرجه بالدنانير
هاذي وصوف الجيب اللي يوده
ي-اموتري ما هو مثلك معيثير
والا أنت ما بك للشريطي مكده
ولا انته منشميني على هدة الطير
راع الولع في غايته ما تسده
لياضرب له قوز والا عثامير
لياجس عزمك عن يمومه تلده
يحتر ماطورك مع الدزق والقير
عزي لمن مثلي زمانه يحده
عليك يا قامت تطول المشاوير
والله يلولا القلب ما باح سده
لا صيح وانخا ناطحين المخاسير
ويظهر من الوافين من طاب جده
كبار الحظوظ اللي بهم نية الخير
لا كان عز النفس قلبي يوده
نشوم والخالق عليه التعابير
أما تركت الطير من دون صده
وجزرت عامي بالهواجيس تجزير
والا حصلي مع هل البرمده
مع وافيٍ دايم خويه بتقدير
وباقي السنين المقبلات المسده
يجي لها من مالك الملك تدبير
الله كريم وطالبه ما يرده
أمر يتمه ما يجي فيه تاخير
مبارك بن منير العوني الحربي