بصمة ناعمة

ألا ياوقتي القاسي ولا ياقلبي المهموم
ولا ياصبري الطايل ولا ياغربه سنيني
ولا ياحظي العاثر ولا يافرحي المعدوم
ولا ياجرحي اللي ساكن داخل شرايني
ترافقنا على الدنيا تعاهدنا على المقسوم
تخاوينا على درب عليه اليوم ماشيني
تعايشنا على الحسرة تعودنا على المشئوم
تمنينا ولو مرة نحس إنا سعيديني
تساهرنا على ليل الشقاء اللي دايم مغموم
ونسأل ليش دايم يامحلا حنا حزينيني؟؟
زماني صار لي ظالم وانا حالي كما المظلوم
يعاملني بقسوة تجرح احساسي وتبكيني
يفرحني مدى ساعة وحزني طوال اليوم
يشرق بي يغربني يضايقني يجافيني
يسهر عيني اللي صار تجفاها طراة النوم
يحير فكري اللي منشغل لأجله ومشقيني
وانا ماني كما منهي تعيش بحملها الموهوم
ولا اطاوع هوى نفس هي أول من يعاديني
تطاوعها وتعرضها على أقشر درب وادنا سوم
تلاعب في مشاعرها ومغويها ردييني
انا والله عزيزة نفس حرة بنت قوم قروم
تفاخر بي رجال بالوفا والطيب ماضيني
ولي مبدأ ولي عزه ولي نظرة ولي مفهوم
ولي فكر يميزني مع شموخ مخاويني
ولا ضاقت معي ناديت باسم الواحد القيوم
عظيم الشان رب الكون خالقني ومحييني
هوالخالق عظيم الشان اصلي للولي واصوم
موكلته على امري خالقي ذكره يداويني
يفرج همي وصبري ويسعد قلبي المحروم
ويعوضني على ماراح لي في ماضي سنيني