نص أوبريت "وطن المجد"

للمجد راس
وللغلا ديرة
والعز للي ينتظر
لاحت تباشيره
صقر الجزيرة عاد
جاها على الميعاد
وأزهر رياض المجد
وتباشرت به نجد
وعم الوطن خيره
* * *
يا موطن الأجداد
يا منبع الأمجاد
لك الوفا والحب
مغروس وسط القلب
حبك توارثناه
أجيالاً بعد أجيال
وأرواحنا تفداه... وأرواحنا تفداه
يا دارنا مجدك فخر كل الأجيال
كل الخصال الطيبة تنتمي له
عبدالعزيز اللي بلا ند وأمثال
من فجر ميلاده لساعة رحيله
عبدالعزيز وخير ما عنه ينقال
هو معجزة جيله وما بعد جيله
سن الطفولة عاشه بعزم رجال
عن اللهو غايات فكره تشيله
لا أعياه تفكيره بتغيير الأحوال
جبر عزاه بركعة وتهليلة
متذكر ميراث الأجداد الأبطال
ورياضه اللي عقب فقده محيله
* * *
يا نخيل فوق وادي حنيفة
طلعها من وقت ما هو لاهلها
هب لك من شرق ريح عنيفة
ساقت مزون يروع هللها
أبشري به يالجبال المنيفة
سيل أحزان القلوب يغسلها
جاك للمجد السعودي خليفة
الهقاوي فاقها ما خذلها
عقب تخطيط العصا سل سيفه
وانتخى في عزوة ما جهلها
* * *
من السيف غرب ما تسمع للاقوال
كن المسافة كلها تنطوي له
سرى وصابح طيبة الفال والحال
بفتح الرياض اللي بها طال ليله
يوم أحكم القبضة عقب فر وقتال
انهى معاناة السنين الطويلة
وصار الكلام اللي بلا رد وجدال
أمان والحكم استعاده سليله
والجفوة اللي بين ساكن ورحال
أزالها اللي كل شر يزيله
توحدت بالقوى علاقات وحبال
العروة الوثقى وخير الوسيلة