باعيشك يازماني

زماني يا زماني فيك لا ساكن ولا سواح=سكنتك يا زماني طرقي أبلشته عناوينه
مشيتك والمراجل في عيوني نورها وضاح=توالف هقوة اللي موقفه ما طاح من عينه
مثل ما يألف القفل المسنن سنة المفتاح=مثل ما الآدمي تألف شماله راحة يمينه
قضيتك والجفاء بعيون حسادي عجز يرتاح=انا اكبر والحسد تكبر معي ساحة ميادينه
بلشنا بالسكاكين وعددها والجمل ماطاح=تخيل في مطيحه كم تصل حسبة سكاكينه
تلاشت راحتي من كثر ما امسح دمعة التمساح=اشوف اكذوبته وامشي معه بالنيه الزينه
توشحت البياض وجيت عدواني بدون سلاح=ما غير الهقوه اللي جبتها ورثة من جهينه
وانا اللي هدني واحرق عليه صفحة الافراح=هذيك الطيبه اللي غرت العدل بموازينه
يصلني كل ليله غصن زيتون بطرفه رماح=وتاقف لا لزمته طيبتي ما بيني وبينه
باعيشك يا زماني لين نبلغ حزة المرواح=ويبقى صاحبك هو صاحبك في زينه وشينه