خواطر من فوق السحاب

هناء عصام
الحسيني شتم موسى... موسي شلق للحسيني ...الحسيني ردح لموسى ...موسى فرش الملاية للحسيني ....اديب اتدخل ...موسى مابطلش ...الحسيني قال ان عاد عدنا ....اديب ردحلهم... لميس توترت و بتخبط ع الترابيزة .....عكاشة دخل بنفر و مبسوط عشان ولعت ....محمود سعد شايف ان اللى بيحصل ده مؤامرة ....خيري معجبوش الكلام و لقح على سعد......عبد الرحيم على مستنى اللى هيجيب سيرته عشان يطلعله بالتسجيلات بتاعته .....تامر امين هيموت يعمل سبق ف الموضوع ده .....الجلاد حالف براس شنبه ان السبق ده بتاعه ....ليليان داوود شايفة انه هيك ما بيصير بس شو خصنا خليها تولع .....خالد صلاح عامل مش واخد باله بس اليوم السابع بينشر الخناقة عادي ....الابراشي مستني الموضوع يهدى خااالص عشان يولعها تاني !!!!!! و لفى بينا يا دنيا ...دوخينا يا دنيا !!
*****
حد يدينى سبب وااااحد للنزول مع الاخوان ف اى مظاهره دلوقتى غير الغبااااء ؟؟؟؟؟
_بتدافع عن قضيتك و عن العدل و الحرية و العيشة الكريمة ماشى حقك ...عندك الف حزب بيدلل على اعضاء انضم لواحد.
_عايز تعمل مظاهرة تعبر فيها عن رأيك ماشى حقك ... هات تصريح و انزل ف حماية الامن
_شايف ان البلد محتاجة كتير عشان تنضف و صوتك مش مسموع ماشى حقك ... رشح نفسك ف البرلمان
_بتحب بلدك و نفسك تمسك سلاح و تدافع عنها ماشى حقك ..جند نفسك ف الجيش او الشرطة اهم بيموتوا عشانها كل يوم.
_كاره البلد و مش طايقها و بتلعن سلسفيلها ماشى حقك .....سافر و سيبها.
_عايز تنتحر وبتدور على فرصة ماشى حقك ....انضم لداعش.
لكن تقولى انا نازل اهتف ف التحرير مع ناس ركبوك الف مرة قبل كده !! ناس نفسهم بشوفوا دمك عشان يتاجورا بيه ف قضيتهم الخسرانة !؟ ناس ادوك على قفاك بدل المرة مليون ؟؟ ناس مستنيين بفارغ الصبر تموت عشان يشيروا صورك على صفحاتهم و يقولوا عليك شهيدهم ؟؟ ناس انت ف نظرهم مجرد كماله عدد ؟؟ ايشنقولك بس ؟!؟ انت مش بتستوعب الدرس لييييه ؟؟
انا مش هقولك انت خاين و عميل و مأجور و الكلام ده و هصدق حسن نواياك لكن حقيقى اغبى من رأيت ف حيااااتى شخص ينزل ميدان المعركة ليحارب و يثور و يناضل و يجاهد و على اتم اتم استعداد انه يفقد حياته لصالح ..............خصمه !.
إعلامية بالتلفزيون المصري