صوت الملام

تعب صوت الملام ولا بقى غير الشعر راحة=ي.. قلبي لا متى تخنقني بنبض العتب واللوم؟!
أنا وش في يديني لو سهام الحب ذبَّاحه؟=أنا وش في يديني لو غرقت وما عرفت تْعوم؟!
عزاي إنِّي كثر ما قد رماني الحب برماحه=لغير اللي سكن بين الحنايا ما نبضت بْيوم
يعيش الحلم في صدر الأمل لو زادت جْراحه=وأنا مهما صنعت المستحيل آمنت بالمقسوم
ي.. قلبي والطريق اللي حرمنا نور مصباحه=نهاياته بداية .. لا تطيح بها تعال نقوم
تعال.. وما يموت اللي.. شموخه دايم سلاحه=أنا وإن طحت بك شامخ .. ولو عشت العمر محروم
تعال.. وخلِّنا نحسب رصيد العمر وأرباحه=ترى حق النوايا البيض.. في هذا الزمن مهضوم
مسافات النصيب اللي كفوفه دوم لوَّاحه=نحاول نختصرها لو غدا حكم القدر محتوم
أمانينا ولو تجْدب سنين العمر.. فلاَّحه=رغم عثْرَة خطاويها ب.. عادات / وقيم / وسلوم
ي.. قلبي شاعرك دلّة.. طموحه دوم فوّاحه=ب.. دنيا ما عرفْنا وين.. ظالمها من المظلوم؟!
يحاول يرسم أفراحه.. رغم تلْوينة أتراحه=كثر ما يغسل هْمومه.. يصافحه القدر ب.. هموم
خَفَت صوت الملام ولا بقى غير الشعر راحة=ي.. قلبي ما بقى فيني نبض بعد العتب واللوم!