قصيدة ” دمعة طفل ” للشاعر “محمد الدحيمي”

لعنبوه الشعر .. كانه .. بس .. في شقر الذوايب
لعنبوه .. ان كان قاصيه .. الغزل والنرجسيّه
••••
يا يبه … والهاجس اللي كان ملحد جاك تايب
إغتسل من نزعة الحاده .. وتاب من الخطيّه
••••
ياالحقوق اللي .. سنا برقه فتق صدر السحايب
ياالبياض اللي .. غفر كل الذنوب السرمديّه
••••
يوم شفتك.. بالسرير الابيض عن الوعي غايب
كل عرق ٍ صاح فيني جعل ذاك الضيم .. فيّه
آآآه .. ليت الضيم رجال ٍ واشدّ له الركايب
والله انّي لأنحره .. واوردّه حوض المنيّه
••••
ياعسى نذلٍ ٍ هقى بك يرجع بهقوته خايب
ضايع ٍ .. مثل القحم .. لاهو رباع ولا ثنيّه
••••
قلت لي مرّه .. ترى النشمي ليا خاواه ..عايب
مثل دهن العود لاخالط .. رماد الشاذليه
••••
ودامني رجلٍ خرج من بين ( صلبك والترايب)
والله ان يبطي القدم ما يمشي دروبٍ رديّه
••••
يا يبه.. و(( دحيم )) تنشد.. وين حلاّل النشايب ؟
شيخها اللي جالها من القيض مقيالٍ وفيّه
••••
يابعد راسي .. وروس احبابي .. وكل القرايب
يابعد من زهّب ( المجند )ولبس ( الحضرميّه)
••••
قم .. !! دخيلك.. ! عقبك الديره غدت جردٍ خرايب
عجّها غطّى سماها .. واستوت بالمهمهيّه
••••
كلمتينٍ .. في شفاهي حايره .. راحت ذهايب
ما قوت تعبيرها كلّ .. الحروف الأبجديّه
••••
اخدعتني بكرةٍ .. ماهي من ابكارٍ نجايب
ولا (غفال ٍ) .. وصفها عند النبيه .. ولا مطيّه
••••
درهمت بي في دجى ليل ٍ نهب شوفي نهايب
ويٍوم افيق إلا ّ وانا باحضان قفراً جرهديّه
••••
واتركتني .. ظامي ٍ والماي للقيض الزهايب
واغبنتني يوم هجّت ( بالقلص) (والزمزميه)
••••
مآمن ٍ للوقت .. لين الوقت ورّاني العجايب
يوم جاد بشربة الماء .. واثرها ( شربة ضحيّه )
••••
يا يبه … وان قصرت ايديني ودارت بي النوايب
بأ رمي اعذاري على الغربه .. وقلّ المقدريّه
••••
هاجسي الملحد .. رجع \ دمعة طفل \ بعيون شايب
وإغتسل من نزعة الحاده .. وتاب من الخطيّه

..
محمد الدحيمي