أجامل وانا قلبي معنى و حالي ماش=يا غبني من اصحاب المصالح ويا شيبي لو اني من صدوف الليالي طريح فراش=تعززت ما ابغى شامت الناس يدري بي غدا جرح قلبي شوكة ما لها منقاش=وخدعني زماني في مفاهيم اصاحيبي وان جات الهقاوي راس ظبي بدون عراش=فانا والله اني ما أتحسف على طيبي اجنب ردي العزم واترك طريق اللاش=لي صار جهده ما غير يشذب عراقيبي وابونية شينة وفكره فكر حشاش=بيتعب و هو يبغى يدور عذاريبي اذا شاف وجهي قام يمدح نباي وشاش =واذا رحت سولف في قفاي و ذكر عيبي واذا صار مشروهي على طلقة الرشاش=فلا عاد يلحقني عتب في مواجيبي كبار الهقاوي طيبها ما يروح بلاش=ومشاريها في سد دقني و اشانيبي وانا في مواجيبي و طيبي مقامي كاش=اليا حان شاني ما اذخر القرش في جيبي عزومي مواردها تبرد لهيب الجاش =ونوادر قصيدي مثل خيرة مناديبي تعلمت من دنياي في رحلة المطراش =واخذت الدروس الكافية من تجاريبي الشاعر المهندس/ علي الشنّاني
