سحابة الجمعة قصيدة للشاعر جازع آل سفران

سحابة الجمعة
أستبشر الشعب السعودي والفرح عم البلاد=وقامت تردد عاش حاكمها وتحيا المملكه
في ظل من كفه على شعبه يجود وفي ازدياد=وخزاين الدوله على كل الوطن مستهلكه
وسحابة الجمعة لها صيت(ن) على العالم وكاد=سمعت بها كل الدول لو بعضها متشربكه
يديرها ريف الفقارا واليتاما باعتماد=حي السحاب اللي يغيم فيه خير(ن) وبركه
من غيثها مابه مواطن ماتهنا واستفاد=وفاضت على كل البقاع لها دوي(ن) وحركه
ما هي غريبة مدتك جزلة وحبك بالفؤاد=سكنت في قلب المواطن والله اللي يملكه
وحكمك على نهج الولي والشرع ما فيه انحياد=واللي نواك بشر خشمه لا تطاول نفركه
نذوقه سم(ن) على كبده ويبشر بالنكاد=ونجيبه مقيد مثل قيد الجمل ونبركه
كله على شانك يابو متعب مواقفنا سداد=أرواحنا دونك فدا لا جاء نهار المعركه
ولا علينا من مجمعة الحكي وأهل الفساد=لو شوشروا عبر القناه وبهللوا بالفبركه
شفنا الدول بعد التظاهر شرّدوا مثل الجراد=صارت بعد عيش الأمان ونعمته متفككه
ولو حاولوا بعض العقايد بالتجمع والعناد=تبت يدين الحاقد اللي موطنه ما يدركه
حنا لهم بالسيف الأملح صامدين وبالزناد=نقضي على من شار بالفتنة بعزم ونهلكه
ولا يزعزعنا التظاهر والولاء شرب(ن) وزاد=فينا غريزة ما نخون وبالعهد متمسكه
يبقى ولاء الأجداد عامر عندنا ولا يباد=ما دام حاكمنا على نهج الكتاب ومسلكه
ويكفيك حاجه ياملكنا وأنت عز(ن) للبلاد=إن الوطن يحيا بذكرك يا وسام المملكه
الشاعر جازع آل سفران