«الانبراشات بدت» بين المحللين الرياضيين !

هلا بكم..يالعايدين من السفر لاحبابكم..نرحب بكم ونهلي في موجز اخبارنا لهذا المساء..احسن ما في اخبارنا انك ممكن ما تحسف اذا م اسمعتها بوقتها..متى ما فتحت على اخبارنا تلاقينا نهذر بالسالفة حقتنا نعيد ونزيد فيه لين قبل لا ندبل كبدك شوي..نطفي الاستديو.. ثم نضف عفشنا ونمشي عشاننا موقعين مع منظمة الصحية الدولية حقت النوم بدري، يااخوان ترى النوم بدري يقوي النفسية، اتركوا هالسهر، ذبحتكم الاستراحات ما غير تبطحون فيها لا شغل ولا مشغلة، المهم اعذرونا اليوم نفسية المذيع ماش لك عليها، عاد ماعندنا غير المذيع الله يقلعه لو هج منين نجيب مذيع لقناتنا، المهم فتحوا اذانكم زين نبي نمحط اخبار ونمشي مستعجلين ورانا شغل:
بالنسبة إلى اخواننا الكورجية يعني اللي يتابعون الكورة لهم عندنا خبر ما دري وش ينقال له، هو خبر زين والا من جنبها، وهالخبر يقول ان كبتن منتخب انجلترا انصاب في ركبته «الله عاد من زين هالركبه»، ويوم شقلوه للمستشفى قال الطبيب ان ركبته رايحه فيها وعساه يقدر يمشي شلون تبونه يلعب كورة، ودروجبا لاعب منتخب ساحل العاج هو الثاني محط على رقبته بس ما نكسرت رقبته ربه يرحمه وانكسرت يده، يقولون اخوياه انه مع لصمقه الاطبا يمكن ربه يوفقه ويلحق يلعب مع الكوتدفوار اللي هو ساحل العاج، عشان كذا تشوفون المنتخبات اللي تلعب هالايام كنهم يلعبون تقسيمه، شفتوا انتم إسبانيا قدام منتخبنا يسوون حالهم يركضون وهم يمشون مشي ولا شافوا اللاعب السعودي مصمل يبي الكورة يتركونها له، ويحذرون بعضهم من خطر الانبراشات اللي يسوونها اخويانا، ومنتخب انجلترا نفسه لعب قدام اليابان كنه يجرب طريقة الباصات العرضية، ويختبرون بعضهم بتبادل المراكز والركض ولا يحبون المحارش ابد، كلن خايف لا ينصاب ثم عاد ما ينفعه سالفة مباراة ودية.
ريس بنك في ألمانيا ما كان لا على باله ولا خاطره ان فيه احد السمرمد مترصد لحرمته، السمرمدي خطف زوجة راعي البنك وهج، وقام يدقدق على الشرقة من قواة الوجه ياتعطوني 300 الف يورو او اكر الحرمة كر خروف، اهب يا قليل المروفة، تخطف عجوز عمرها اربع وخمسين سنة قد والدتك يالخسيس ويوم ما تجيك الفلوس تطعنها وتهج، الشرطة المفهية قامت تحوس وتدوس تبي تبرر فشيلتها انها ما قدرت تمسك هالسربوت قبل لايكر العجيز المسكينة، تقول ان المجرم يوم كلمنا قعد يهايط واجد ولا قدرنا نسوي شي، العجوز المسكينة لقوها مرمية بين الاشجار ورايحة في خبر كان، عاد ريس البنك اللي هو رجالها ما جابت الوكالات أي شي عن ردة فعله عقب هالموضوع بس هذي ما تبي لها وكالة انباء اكيد ان كبده وارمة ويحوم مثل المقروص يبي مسكة حلق هالسربوت اللي ما يخاف الله.