تربية (الحيوانات)!

كان يا ما كان.. فيه دب وراعي دب، صارت بينهم علاقة صداقة، راعي الدب يعرف الدب من زمان بس ما يعرف ان الدب جاهل وله قلبات ممكن تخرب الاولى والتالية، كثير من الناس ينصحون راعي الدب بأنه يتعوذ من الشيطان ويترك هالصداقة اللي ما يندرى وش عاقبتها، راعي الدب ما عنده غير رد واحد يرد فيه على الناس اللي يبيون ينصحونه وخايفين عليه يقولوهم يا جماعه ليه اتركه وانا ما شفت منه شي شين، الناس يحاولون يفهمون راعي الدب ان الكثير من الحيوانات عداوتهم لنا عداوة جينات لاصقة في جماجمهم، يعني مهما تعاشر انسان وحيوان، لا بد يندم الانسان انه عطى الحيوان وجه، اللي يعشق تربية الحيوانات المفترسة يحاول انه يلغي مخه، وعلى كثير الجرايم والهوايل اللي تسويها الحيوانات المفترسة باللي يربونها، الا ان فيه ناس للحين ملغين عقولهم ومدرعمين ولا هم راضين يصحون لين يلاقون انفسهم ضحايا للحيوانات المفترسة، راعي الدب ما طاع يقبل نصيحة، الناس اللي خايفه عليه لين هبده الدب على راسه لانه كان ناوي يطير ذبانه وقعت على راس راعيه، لا تربون الحيوانات المفترسة، وش تبون من هالطبع الأقشر، ترى اي انسان يحاول يتعايش مع الحيوانات المفترسة بالاخير هو اللي راح يندم، واللي يربي الحيوانات المفترسه يستاهل ما يجيه.