مهايط وزارة (العمل)

أبيكم يا إخوان يا قراء تركزون بالخبر اللي راح اقوله لكم زين.. اجمعوا كل خلايا مخكم.. وحاولوا تستوعبون شي صعب انه يستوعب ويمكن يحتاج عشرين سنة عشان ينهضم، يقول الخبر: ان وزارة العمل حقتنا.. راح تروح لقمة الدول العشرين اللي راح تستضيفه امريكا الشهر الجاي، يعني عشرين اطلق دول العالم الصناعي والاقتصادي تبي تجيهم وزارة العمل حقتنا تعلمهم: كيف تسريع عمليات توفير الوظائف.. والله اني قريت الخبر وطمرت من طولي، قريت الخبر مرة مرتين ثلاث يمكن فيه غلط.. يمكن قمة الدول العشرين طالبة وزارة العمل حقتنا عشان تعلمهم كيفية تسريع عمليات توفير الوظائف، كذا الخبر يخش العقل، أسألكم بالله العلي العظيم يا قراء هل تصدقون ان وزارة العمل حقتنا رايحة لقمة الدول العشرين تعلمهم كيف يسنعون اوضاع اكثر من مليار عاطل عن العمل، لا لا لا لا، ما اصدق، بالله اقروا الخبر: (قالت وزارة العمل إنها تحمل أجندة من التدابير المهمة لتسريع عمليات توفير الوظائف ودعم العمل اللائق وذلك خلال اجتماع وزراء العمل “لدول مجموعة العشرين” الذي تستضيفه واشنطن أبريل المقبل كما تحمل الوزارة أجندة حول تدريب العاطلين عن العمل)، عرفتوا الحين ليه طلعت نخلة براسي، الحين العاطلين من شبابنا لا قروا هالخبر وش راح يكون شعورهم؟ ستين ألف شغلة تحتاج تسنيع عندنا تاركينها ورايحين تبون تسنعون مشاكل العمل، الوظايف بالحسرة، والعاطلين يزيدون يوم ورا يوم ولا هم لاقين ياكلون، ووزارتنا الله يحفظها رايحة تسنع امريكا وخويتاها، احد يقول لي ان الخبر مو صحيح!