أزواج وزوجات

بعض الحريم مخها مدري كيف جاي، يوم تسمع كلامها وشكاويها من زوجها تحس أنها أحسن زوجة بالعالم، ويوم تسمع كلام زوجها تحس أنها ما تسوى ريال وزوجها يحسسك بعد أنه أطلق زوج بالعالم، مع أن الدين الشريف يحرم أن الواحد يطلع أسرار بيته للناس، لكن الحريم الله يهديهن تحسب انها اذا تذمرت من زوجها ان هذا نوع من عدم تطليع الاسرار. التذمر بين الزوجين قدام الناس حالة نفسية خلت أكثر العلاقات الزوجية تصير ما لها طعم وكلن صابر عشان البزارين، أحلى حياة لامن الانسان تذكر تعاليم دينه وضميره وقضب لسانه عن التذمر وسب الزوج أو الزوجة، وبعض الحريم على كثر ما تتذمر من زوجها وتسبه قدام خوياتها لو طلبت منها تسمح يتزوج زوجها ترفض ويمكن يغمى عليها، ودام ما تبينه يتزوج عليك ليش منكده عليه عيشته، وبعضهن من خوفها ان زوجها يتزوج عليها تلاقيها تحاول تفلس فيه وتصرف كل قرش بجيبه عشان يمحط للارض ولا يفكر ولو تفكير أنه يدفع ثمن شماغ مو ثمن بشت العرس، الزواج الشكلاني اللي صار ها الايام هو اكثر شي محتاج ان الحرمة تكسب رجالها قبل يطير منها وترجع تلوم حالها، ودي ان الجمعيات المختصة بالاسرة تعمل لقاءات مستمرة بين المطلقات والمتزوجات عشان كل وحده تنصح الثانية انها ما تسوي حالها سندريلا وتستاهل زوج احسن ثم تتطلق وتندم، ما فيه مطلقة ارتاحت بعد الطلاق بس بعضهن يكابرن!