ودي أصير هامور

معقول اللي يصير؟.. معقول تنسرق عيني عينك واللي سرقك تشوفه يتمشى لا حسيب ولا رقيب.. والله يا بعض السوالف ما تصير في الغابات اللي للحين ما وصلتها قوانين الأمم المتحدة.. سرقات المساهمات العقارية ترى ضحاياها كثر ضحايا الأسهم.. والمواطنين ما كان عندهم من يوعيهم.. كنتم تاركينهم يضيع شقى عمرهم عيني عينك.. وإذا اشتكى على الهامور العقاري اللي سرقه يمكن حتى الورثة ما ياخذون لا حق ولا باطل.. ويوم حطيتوا قانون جديد عشان يضبط الهوامير لا تطحن المساكين.. كتبتوه وما عاد نشوفكم.. نبي نفهم ياخي.. نبي نعرف.. كل اللي فهمناه ان الفلوس تنحط بالبنك.. وفوايدها تروح للهامور.. كن قانونكم مستحي من هالعالم النصابة.. آلاف المواطنين مسروقة منها ملايين ويشوف الهامور اللي سرقه قدام عينه ولا يقدر يحاكيه.. ولو كلمه يمكن ينسجن.. اللي عرفته من كثير ناس خبروني.. ان حتى وزارة التجارة معطية بعض الهوامير ضوء أخضر في انه يسوي مساهمة عقارية ولما تورطوا المواطنين وساهموا وطلع الموضوع نصبة.. اكتشفوا هالمساكين ان تصريح وزارة التجارة اللي انعطى للهامور غير مستوفي الشروط .. مئات الملايين انلهفت من المواطنين.. كلنا ودنا ومنى عيونّا نكون هوامير.. بس إذا ما فيه أحد يضبط جشعنا راح ناكل العالم.. راح تصير الأمور فوضى لا حسيب ولا رقيب.. أقل شي ياخي حسوا فينا.. فهمونا.. عطونا من وقتكم شوي.. وإذا خربت خربت.. ليش ما تحطون جوايز ترضية للمنصوب عليهم.. وجبة ماكدونالدز مع بيبسي كبير.. صدقوني حنا مساكين.. يرضينا أي شي.