القبول الإلكتروني.. (أذن جحا)!

قبل كم يوم قريت خبر ان فيه جامعة (وغيرها كثير) معلنين انهم راح يستقبلون المتقدمين من طلبة أو موظفين عن طريق التقديم الإلكتروني، اللي يقرأ الخبر وهو مايدري عن بواطن الأمور يقول يازين التطور زيناه، بس البلا لاعرفت بواطن الأمور تعرف ان سالفة التقديم الالكتروني مثل قلتها، وعلى قولة اخواننا المصريين (مش جايبة همها)، والتقديم الالكتروني معناه انه يجي الطالب ويدخل موقع الجامعة ويعبي استمارة ثم ينتظر لين تطلع النتايج، والحوسة اللي صايرة عند طلوع النتايج، يطلع نص المقبولين حاطين معلومات غلط، يعني تكون نسبتك في الثانوية سبعين بالمية وتقدر تحط تسعين عشان السستم يقبل تقديمك، وهالحركات والبزوطة تصير عشان مافيه نظام الكتروني يحكم جميع الاطراف، يعني شلون تحطون تقديم الكتروني ومافيه حكومة الكترونية تحمي الطالب منكم وتحميكم من الطالب، ليه نهايط ونشخص قدام العالم وحنا عارفين اننا نبي نحوس بهالتقديم ونعيد ونزيد عشرين مرة لين تضبط الأمور، وياما فيه ناس يستاهلون ينقبلون بس بالاخير ينقال لهم ماعليش السستم هو اللي اخطأ خلونا نشوف وش المشكلة، وتدرس العالم وتروح الفرصة ولاانحلت مشكلة السستم، وش ماسويتوا راح يجيكم ناس متقدمين يحطون معلومات من روسهم، عاد الواحد لاصار جالس في بيته ويعبي معلومات عن نفسه يحط أطلق معلومات تخليه رقم واحد ويحرم ناس احق منه، وكل العقوبة اللي تصير انها تستبعد اوراقه اذا انكشف، خلونا على نظام الملف العلاقي ارحم دام، الدعوة زبرقة في زبرقة!