عنوسة في المخ

أدري ان الكلام في العنوسة ومالعنوسة في هالايام اللي اقتصاد العالم يرقل وواقف على رجل واحده كلام ما له داعي، بس أعجبني جمعية أسست في الجنوب لحث الشباب المتزوجين انهم يتزوجون أكثر من واحدة، وهالفكرة الممتازة تبشر بخير بالنسبة للرجال بس حركة نكبة وتبشر بالدمار بالنسبة للحريم، يصايحون وش ذنبنا يتخرب بيتنا عشان عانس ما هي لاقية زوج، لازم كل البلد يتكاتفون يدعمون حركة الزواج أكثر من واحدة، عندك أنا يابو العريف ودي أتزوج من واحدة ثانية بس من يفزع لي على المدام، من يساعدني لاقامت وسحبت الساطور وحشرتني بالزاوية، محتاجين جمعية تقاوم عنف الزوجات ضد الأزواج، محتاجين احد ينقذنا، صحيح فيه أزواج ودهم يتزوجون من أكثر من زوجة بس فيه أزواج بالهبل ودهم يفتكون من الحرمة اللي جالسة على كبودهم وشلون تبونهم يتزوجون واحدة ثانية، المشكلة ما هي بس عنوسة الحريم، المشكلة عنوسة الحريم المتزوجات، اللي متزوجة من زوج بالاسم، محسوب عليها زوج وهو لو كانت عانس ولاتزوجته كان أريح لها واستر لها، ماحد يناقش العنوسة المقنعة بالنسبة للزوج أو الزوجة والضحايا هم الأطفال المساكين، فيه كثير من الأزواج عايشين جوا بيوت تملا العنوسة كل جدرانها، كل من يمشي على راسه، ووراعينهم كنهم يتامى الله لايبلانا كل أمورهم معتمدة على الخدامة وشي من لحية!