الله لا يبلانا!

دايم نقرأ عن أشياء حنا طايحين فيها ويطلع عنها خبر أنها تسوي أمراض وبلاوي زرقا.. ويا ربي لا تغيرها علينا من نعمة من كثر الفضاوة عندنا ما غير رايحين جايين نشتري في الأكل وأدوات تفتيح البشرة وحبوب الريجيم اللي تنوكل قبل الأكل واللي تنوكل بعد الأكل واللي تأكلها على لحم بطنك عشان تخرط البنكرياس ويجي محول على المثانة ويطلع خصر ولا خصر جنيفر بنت لوبيز بس بعد ما تخلص الريجيم لا تزعل إذا لقيت واحدة من رجولك أقصر من الثانية، حنا ما غير نلهم أي شي في يدينا من زود حبنا للرشاقة.. النكبة إن الإخوان في العالم المتقدم يقولون لنا انتبهوا من الشامبوهات اللي تطلع رغوة كبيرة لأن السرطان يكون لا بد في بطنها وحنا ما ندري.. اسمعوا الكلام اللي يجمد على الشارب، افحص المكونات المكتوبة على قارورة وتأكد من عدم وجود مادة تدعى سلفات لورييث الصوديوم (Sodium Laureth Sulfate) واختصارها بالحروف الإنجليزية (SLS)، اكتشفوا أن هالمادة تدخل في تركيب جميع أنواع الشامبو (لأنها تنتج قدرا كبيرا من الرغوة إضافة إلى قلة تكلفتها ورخص ثمنها. لكن من الحقائق المذهلة عنها أنها تستخدم في شطف الأرضيات وهي مادة قوية المفعول كما أثبت بعض العلماء في الولايات المتحدة أنها يمكن أن تسبب مرض السرطان على المدى الطويل)، وسمعنا بعد أن فيه معجون اسنان يسوي فقاقيع ملغم بهالمادة المسرطنة.. 
الله لا يبلانا.