الله يثبتنا!

معاكم العبد الفقير إلى الله، الموظف العريق بسنوات خبرة طويلة على بند الأجور في إدارة المدري ايش للشؤون المدري ايشية، في الوزارة اللي هيه، ومثل بقية اخواني المواطنين الكادحين سمعت أوامر ملكنا الغالي وفرحت بقراراته وانبسطت اكثر لأنها كانت تشملني بشكل واضح ومحدد ولا يقبل أي تأخير، وأخيرا.. راح اتثبت واصير موظف رسمي لي وضعي وراتبي وبدلاتي وتتغير حياتي الوظيفية والأسرية والمادية.. يا الله من فضلك.
من يومها وانا اتابع الجرايد.. اكيد طبعا لازم اشوف القرار «اللي يشملني» وش صار عليه، الوزير الفلاني يؤكد على التوجيهات السامية بتنفيذ القرار فورا، بعد يوم.. المسؤول الفلاني يؤكد الالتزام بسرعة تنفيذ القرار، بعد يومين.. الإدارة الفلانية تطلب من «اللي شملهم» القرار الاستعداد والتأهب لتطبيقه عليهم، استعديت وكتبت رسالة وداعية لبند الأجور اللي عانيت فيه كل هالسنوات، وصرت ادعي كل يوم «الله يثبتنا».. وانتظر الاخبار الزينة في أي لحظة عشان افرح العيال وامهم.. بس ماني عارف وش اسوي عشان تضبط سالفة التثبيت هذي؟ اروح الدوام ومعاي مسامير وشاكوش مثلا؟
راحت ايام وليالي، مازلت موظف بند الأجور المستحق للتثبيت بحسب النظام والقانون لتطبيق قرار ابو متعب الله يحفظه، إدارتي تعرف هالشي زين، لكن إلى ها للحظة مصرة ان القرار «ما يشملني»!