فوائد قومٍ!

شي يخليك تحمد ربك وتبوس يدك من الجهتين لما تشوف بعض التجار شلون يتعاملون بطريقتهم الخاصة مع هدية ابو متعب الله يحفظه لشعبه، يقول لك مكتشفين أكثر من مطعم ومحل ملابس سمعوا القرارات من هنا ورفعوا اسعارهم من هنا، يقال لهم محد يبي ينتبه يعني مع الفرحة والوناسة!
ماني عارف وش هالاستغلالية اللي فيهم صراحة، يعني على بالك انت واياه مسوي ذهين وراعي عقلية جبارة وتعرف تتعامل مع المستجدات وتخليها لصالحك، وش هالطمع يابو الشباب.. الحين رفعت مرة وثنتين بسبب وبدون سبب لين صار بدل الغلاء جزء اساسي من دخل المواطن، وماكفاك ورجعت من جديد تغلي الاسعار.. الا وش رايك بعد يصرفون للمواطن راتبين بعد كذا، واحد يمشي فيه حياته وواحد عشان يلحق فيه على مزاجك ذا اللي ماله سقف!
صدقوني المسألة ماهي فرق 10 ريال في بنطلون، والا فرق 5 ريال في وجبة مندي، المسألة معناها الوحيد ان الاخ الكريم حب يتفاعل مع القرارات لكن بطريقة سلبية وأنانية، لكن لما يكون التفاعل الإيجابي انه يعطي راتب مضاعف لموظفينه يسوي نفسه نايم، يعني لا هو اللي عطاهم خير، ولا هو اللي كفاهم شر زيادة السعر، لكن وش بترجي من ناس حكمتهم في الحياة «فوائد قوم عند قوم فوائد!».