ماجاك علي!

مدري ليش يقولون ماعندنا فلاسفة مع اننا اكثر ناس نتفلسف في كل شي، ياعمي جب لك أي واحد من أي مكان واسأله عن أي شي يعطيك كلام نهائي مايقبل النقاش، تبيه يشخص لك مشاكل القطاع المصرفي وعلاقتها بالأزمة العالمية ماعنده أي مشكلة، تسأله عن المنتخب يعطيك الاسباب الحقيقية في الاخفاق «في رأيه هو طبعا» ويشرح لك الخطة الكاملة اللي عنده لتطوير الرياضة، اسأله عن المطاعم والخدمات والتعليم، ماتشوف الا حفلة معزومين عليها كل الاحكام والتعميمات اللي تخطر على بالك من نوع «مافيه خير» و«ينعاف تاليه» و«امحق» و«ماهيب الهقوة فيهم»!
المشكلة في الموضوع ان الاخ الكريم اللي زي هذا مستحيل يعدي من عنده سؤال ومايجاوبك عليه بحكم قاطع، حتى لو تسأله عن هواية ولد وزير خارجية سلوفاكيا، واذا بايع نفسك من جد روح قول له انك مزكم والا فيك قل صح.. لأنه وقتها بيطلع دفتر النظريات ويكتب لك روشتة دوا وينصحك فيه وهو أبد.. باصم عليه مرة، وبتاخذه طبعا وانت متأكد ان الرجال فاهم.. الين تكتشف بعدين ان الدوا حق الزكام اللي نصحك فيه هو اصلا حق لين عظام.. طبعا انسى انه راح يجي عشان يتحمل النتيجة بدالك.. مع العلم انه قايل لك «خذه يارجال وماجاك علي»!