مخترعينا يخرعون!

ما فيه يوم تطلع في جرايد الا ونقرأ عن اخبار مخترعين سعوديين مسوين الهوايل، بس الى تاريخ نشر هذا الخبر «منت هين يا وكالة الانباء» ما شفنا ولا مخترع سعودي اخترع صاموله، او مفك صلصل، عشانهم يا حبة عيني ما حد معطيهم وجه، وين ما راحوا يلاقون انواع التطنيش، من مكتب لمكتب لين تنسى حتى وش كنت تبي تخترع، يمتلي مخك باوراق ومواعيد المراجعات ولا عاد يبقى من مساحة غرفة المخ حقت الاختراعات غير مكان صغير ون ما يكفي حتى انك تفكر تخترع كيرم ما يحتاج انك ترش عليه بودره عشان يمشي المضراب، اكبر شي سووه للمخترعين السعوديين انهم استأجروا لهم صالة كبيرة وقالوا لهم تعالوا يالله اعرضوا اختراعاتكم، وهالمساكين تجمعوا وجابوا اغراضهم، وضيعوا وقتهم يشرحون لزوار المعرض، وعيونهم فيها دمعة خفية «بدينا نكتب شعر»، ويبون أي احد ينشدهم عن اختراعهم، عاد المخترع نفسه ومنى عينه انك تقول له وش فكرة اختراعك يالاخو، ينطلق كنه ما حكى سنة كاملة، ولا خلص من الشرح وده يقول تكفى ما تعرف احد يدعمني بالقروش عشان اشوف اختراعي على ارض الواقع، عاد تدخلون انت وياه بسالفة ثانية، يبدأ يقص لك قصة عمره وانت تسوي حالك متأثر وجايتك البكية، فعلا وضع المخترعين السعوديين يجيب البكا، ويغم القلب، شباب عقول تنلف بحرير، مو لاقين أي تاجر او جهة تدعمهم بكم قرش؟ ما بي احلف لو انهم اجانب كانوا لقوا الف تاجر وتاجر يقول لهم بس تعالوا!