الزهراني: الفنانات شوهن لهجتنا السعودية

شاهد عيان من الشارع العام، على الأعمال الرمضانية ونجومها.. له وجهة نظره تجاه ما تابع من الأعمال وله رأيه الخاص بالطبع..
حاوره: حمد فرحان
- وش اللي تابعته أمس من الأعمال الدرامية؟
شفت شوي من طاش وما كملت وقلبت على سكتم بكتم ومن أول حلقة ما أقدر أحكم.
- طيب ناوي تواصل تشوف سكتم بكتم وإلا طاش؟
صراحة محتار بس الأولى طاش وبعدين تجي باقي الأعمال.
- كيف تشوف المسلسلات السعودية في الفترة الأخيرة؟
لك عليها.
- وشلون؟
كله تكرار ولا جديد إلا الأسماء فقط.
- وش اللي تحس إنه ناقص في الدراما السعودية؟
أشياء كثيرة أولها تغيير الفنانين وثانيا الكتاب اللي كلهم كوميديين مدري من اللي قايلهم إنهم خفاف ظل.
- مو عاجبك شي الظاهر؟
ما هي بالمسألة بس ياخي إنت صحفي فني وتتابع الأعمال العربية والخليجية وشوف الفرق ما فيه وجه للمقارنة أبد.
- بس الأعمال السعودية مطلوبة في القنوات الفضائية؟
مطلوبة على شان شي واحد بس وهو المعلن.
- لو عندك صلاحية في عزل فنان عن الشاشة والتمثيل فمن ستختار؟
كذا بيزعلون لكن لا يخافون ماعندي صلاحيه في هذا الموضوع عشان كذا باختار يوسف الجراح وعبدالعزيز الفريحي وفنان ما أعرف اسمه بس طلع في مسلسل أم الحالة مع حبيب وأسعد الزهراني.
- وش رايك في الفنانات السعوديات؟
فيه فنانات سعوديات صدق..كلهم متسعودات ومشوهين لهجتنا في الأعمال.
- أي البرامج تشدك؟
برامج المسابقات اللي فيها إثراء ثقافي وهذي قليلة بس حروف وألوف أحيانا تكون أسئلته جيدة.
- وكيفك مع البرامج الدينية؟
أحيانا البرامج الدينية تكون أقل من المستوى ولكن هناك عددا من البرامج الجميلة منها برنامج حجر الزاوية.
- والأعمال الخليجية الأخرى وش رايك فيها؟
شوف أعمالنا الخليجية فيها الزين وفيها الشين ولكن في الغالب يطلعون بأعمال حلوة.
- والعربية؟
الأعمال العربية تشدني صراحة المسلسلات السورية وهم المسيطرون على الدراما وغطوا على المصرية.
- لو كنت منتجا.. من الممثلين الذين ستجمعهم في عمل واحد؟
هذا لو كنت لكن بقولك لو أنا هامور إنتاج لجمعت نجوم التراجيديا في عمل ونجوم الكوميديا في عمل فمثلا أجمع في الكوميديا ناصر القصبي وحسين عبدالرضا وطارق العلي وبشير غنيم في عمل والتراجيديا أجيب إبراهيم الحربي وعبدالمحسن النمر وغانم الصالح وحياة الفهد.
- رسالتين تبي توجيهها لفنان وفنانة؟
رسالة إلى الفنان فايز المالكي أقول له تراك غثيتنا بشخصية مناحي أنت فنان يطلع منك أكثر، أما الرسالة الثانية أوجهها للفنانة ريم عبدالله وأقول لها تصريحاتها تنم عن غرور وما فيه داعي تقولين إنك هلالية في كل لقاء.