مذيعين القنوات السعودية حالتهم حالة !

بصراحة يا إخوان.. كل شخص قدر الله عليه.. وصار مذيع عندنا الله يعينه ويرفع عنه بلواه.. لأن أموره متلعوزه وحاله تنشكى لله.. والمذيعين السعوديين سواء كانوا بالتليفزيون أو بالإذاعة يملكون طاقات ومواهب تنافس أحسن المذيعين بالعالم العربي.. لكن ما حد يعرفهم وعايشين خلف الأضواء.. ورواتبهم أجبرتهم يتسلفون آخر الشهر عشان يمشون أمورهم.. وأتحدى أي قارئ سمع أن فيه مذيع سعودي سوى عزيمة «ذبيحة» أو عزم أخوياه.. ما هو بخل.. بس عشان الراتب له أكثر من عشرين سنة ما تغير.. والمشكلة اللي تعور القلب إن المذيعين كل يوم والثاني تجيهم عروض مغرية من قنوات منافسة بضعف رواتبهم بس إخلاصهم وتعلقهم بقناتهم وحبهم للسعودية كاسر ظهورهم ولا هو مخليهم يتركون حبهم الأول.. وبعدين يا إخوان إلى متى ومذيعينا خلف الأضواء لأن الإدارة تمنعهم من التواجد عبر وسائل الإعلام الأخرى أو إجراء حوارات أو أن يظهروا كنجوم.. وبعدين ليش الإذاعة السعودية ما تعلن أو تستقبل الإعلانات عشان يزيد دخلها وتصرف على مذيعيها قبل يطفشون للإذاعات الثانية.. صدقوني.. عندنا ولله الحمد مذيعين ممتازين وعندنا إمكانيات ممتازة بس محتاجين تغيير بعض العقليات الإدارية في إدارة البرامج عشان يرجع للإذاعة السعودية مجدها القديم اللي ضاع منها ولا ندري وش الأسباب....
نتمنى مع هالتطور اللي تعيشه بلادنا.. أن تتطور إذاعتنا ونشوف أشياء وبرامج مميزة...
خلوا الإذاعة تستقبل الإعلانات.. حطوا فيها برامج مثيرة تستقطب الناس.. اعلنوا عن برامجكم بالصحف.. عطوا المذيعين حرية الظهور بالصحف..غيروا موظفين العلاقات العامة اللي ذبحهم النوم وأكل الفول كل صبح.. حرام عليكم.. والله إنكم غالين علينا ولا ودنا نشوف أحد أحسن منكم.. بس الله يهديكم .