لمتى حنا كذا ؟!

كل يوم يومين تعلن هيئة الغذاء والدواء سحب شغلة من الاسواق او من الصيدليات، وحنا ما ندري هو اعلان سحب او اعلان زي التحذير ان هالشي ما يصلح يا مواطنين ولا تقربونه وكلن ذنبه على جنبه، واظن حسب ما سمعت ان هيئة الغذاء والدواء ما عندها احد يسحب من الاسواق ويا دوب عندها موظفين يشتغلون بفحص هالشغلات يعني لو غاب موظف او راح اجازة ما حد يسد مكانه لين يجي ينطبق عليهم المثل الشعبي عسى كحلها يسد عينها، يمكن والله العالم ان السحب يخص امانات المدن او المناطق، عاد هالشي حنا كمواطنين ما يهمنا اللي يهمنا اننا نبي نشوف احد من أول دقائق من الإعلان ان هالشي مضر ولا يصلح انهم ينطلقون زي البرق ويسحبونه، ما نبي اللي يبيعونه من يسمعون بالاعلان يوزونه كم يوم ثم لا راحت العجاجة طلعوه وقاموا يبيعونه بعين قويه، والشي الاهم من هذا كله، بعد ما تعلن هيئة الغذاء والدواء ان هالشي مضر ويسبب بلاوي منهو اللي ياخذ حقنا من اللي يبيعونه وضرونا فيه؟ ما عمرنا سمعنا انه بعد ما اعلنت هيئة الغذاء والدواء ان فيه جهة رسمية قامت ومسكت الوكيل اللي جابه عشان يتاجر فيه على حساب صحتنا وسجنته او غرمته، ابد انت جب وبع وبعد كم سنه لا سحبوه غير النشاط وجب نوع ثاني وهكذا الدرعى ترعى، ماش مدري لمتى حنا كذا؟