(الأمل مقتول) مُنى الزهراني

( الأمل مقتول)
شعر :
مُنى الزهراني
صعب إني أكون أمشي بسكة أو طريق مجهول=والأصعب عدم علمي وش أصعبها من أسهلها؟!
من أول رحلتي فيني طعن زهر الشباب ذبول=وش آخرها ؟ مدام أقسى طعوني جت من أولها؟!
خيالي وواقعي شفته يحيّر في فضاه عقول=من المعقول يرسم لي حقايق مااتخيّلها؟!
ترى ما يجرح العاقل من الدنيا سوى المعقول=وأنا المجروح من دنياي لو ما كنت عاقلها
أبي أكتب بأوراقي كلامٍ لك وشرح يطول=وأوضّح لك عباراتي عشان تكون فاهمها
وأبي أسألك ياغالي دام إنك عني المسؤول=وإنّك دايماٍ ترسم بعيني دمع فرحتها
أنا غلطان يوم إني أقول بداخلي هالقول؟=أبوي اليوم جهّز شي يقول أبغى أفاجئها؟!
أبوي اليوم بيحضني ويبارك لي بهالمحصول=بيهديني هدية رمزها( يارب تفرّحها)؟!
أو إني ماعرفت شلون أفكر طول هذا الحول؟=وإني شايفٍ أشياء حقيقة ماني عايشها؟
في هالدنيا أشوف الناس من حولي تصيح تقول=أبوي اليوم هناني ياربي اش كثر فرحتها!!
أحاول إني أتعايش مع نفسي بهذا القول=أثاريني أحطمها بحلمٍ زاد صدمتها
ألا يا كثرها صدمات تعيّشني أمل مقتول=سببها كل أحلامي يوم إني بحب أرسمها
يا ربي ليه أنا أتخيّل وأعيش بشي مو معقول؟!=وأنا عارف بهالدنيا ألا ياكثر صدمتها؟!
هنا ضمتني أحزاني بدون أدري وش المحصول ؟!=هنا سكين لمعانق شرايين الفرح ولها
هنا علّقت دمعاتي بدون أحكي بدون آقول=هنا ماحنت البسمة علي وقلت أزعّلها
هنا وإلى هنا يكفي عجزت أوصف عجزت أقول=عجزت أوصف ألم قلبي وحزن نفسي وأجمّعها
عجزت أروّض بصدري صدى جرح وجموح خيول=أنا مدري غضب وإلا بقلبي تلعب وتتلهى
وقفت وما وقفت إلا أدوّر للأمور حلول=أبعثر ما ورى نفسي إلين أثقلت كاهلها
تعبت أحمل من الأحلام على متني النحيل حمول=وأنا نفسي وهي نفسي وربي مااتحملها
لأني كل ما اقرّب أشوف إن الطريق يطول=وهو صعبٍ عليّ أرجع والأصعب كيف أكمّلها؟!
أخاف أرجع وألاقيني على ذاك الأمل مقتول=وأخاف أمشي لآخرها وأشوفه يشبه أولها