أعظم الحكام تاريخ وعقيدة

خادم البيتين مكه والمدينه
مقدم اصحاب الجلاله والفخامه
اعظم الحكام تاريخ وعقيده
واجزل الحكام حتى خصامه
نجدة المضيوم زيزوم الحرايب
موصل حبل الرجا عقب انصرامه
فارس عند المصادم ما تدرع
روحه بكفه ودرعه من حسامه
يضرب بسيف بالاسلام يتعبد
اعرج حط الولي فيه استقامه
لا حضره العيد ما يأخر فطوره
يعرف ان العيد ما يقبل صيامه
الهزبر الضيغم الليث الغضنفر
ليث وبين الليوث اله الزعامه
من يلد العين في ساحة عرينه
ماهوب مأمون من شر انتقامه
يبطش بناب عن الهزل يتعفف
مطعم وحوش الفلا فضلة طعامه
فريسته ما ياكل الا من نحرها
تقل حطو له بمنحرها علامه
ويلطم وجيه العدا بمحمدينه
في نهار فيه للرمي احتدامه
شبل اخوه وشبله اللي بالشدايد
روسهم تقدح سعاطير وقرامه
روس اواليد من احفاد الموحد
عزمهم عزم وصرامتهم صرامه
تستشد الريح وتهب العواصف
والجبل سلمان منتصب قوامه
يعربيا لاعتزت فيه العروبه
يطلع طلوع القمر ليلة تمامه
اليمن يوم اخبث الخلق اخطفوها
ما ضرب حسبة مكثرة الملامه
من عقب ماوخذت من احضان اهلها
ردها لأحضان اهلها بالسلامه
نصرا يسجل بتاريخ الجزيره
مثل نصر معزي بيوم الرغامه

الشاعر سلمان العصيمي
جزء من القصيدة التي ألقاها في افتتاح «الجنادرية»