مدرب وطني

بالبلدي الفصيح

ما أقول إلا الله يكافيك يا ريكارد من يوم ما جيت عام 2011 وانت جالس تعجن في منتخبنا عجن لا تشكيلة ولا خطط فنية زي الاوادم، ملايين دخلت في كرشك وما لقينا منك الا الهم والغم والنكد، من 2011 وانت خابصها آخر خبص، من 2011 وانت منت عارف تحط تشكيلة تلعب كورة صح، الله يكافيك حتى تكتيكك ما وصل لمستوى تكتيك عيال الحارة لما كانوا يتلموا في ملعب السوداني في البغدادية والا في ملاعب الزهور زمان لما كانوا يلعبوا كورة صح، صحيح ما كان في خطط فنية كبيرة بس كان في لعيبة تبرم الملعب برم وكل واحد بيلعب في خانته مزبوط .. اما انت منت عارف راسك من رجولك تختار لعيبة المنتخب وتلعبهم في غير مراكزهم جبتلهم الجنان وفقدوا الذاكرة والتركيز بسببك، قهرتهم بتخبيصك الكروي، خرجتنا من كأس العرب وخرجتنا من كأس العالم وسقيتنا المر والحنظل لما خرجتنا من كأس الخليج وضحكت علينا العالم كلها وكل ده بسبب تكتيكك الفني العقيم .. من 2011 وانت منت عارف تختار وتولف مجموعة تلعب كورة صح، من 2011 وانت منت عارف تختار 22 لاعب يبيضوا وجه البلد، من 2011 وانت كلمة توديك وكلمة تجيبك وشغل الواسطه ماشي معاك زي الحلاوة، من 2011 وعينك بس على لعيبة دوري زين يا اخينا حرام عليك في لعيبة في دوري الدرجة الاولى والثانية يستنوا فرصة بس عشان يمثلوا البلد، يا ناس يا هوه يا اتحاد الكورة لنا اكترمن 50 سنة ونحنا بنلعب كورة وبنشارك في مسابقات آسيوية وعالمية وقارية كل هادي السنوات وكل هادووول اللعيبة اللي تركوا الكورة واعتزلوا من ايام ملعب الصبان في جدة وملعب اسلام في مكه وملعب الملز وملعب استاد جدة واستاد الملك فهد وغيرها من الملاعب الموجوده في بلدي معقولة مافي منهم على الأقل 50 مدرب وطني عليه القيمة .. ضاعت ملايين الدولارات في مدربين أجانب أكلوا الأخضر واليابس.. كنت اتمنى من كل قلبي انه هادي الملايين صرفت على مدرب وطني يمثل بلدي وينحرق عشان بلدي لكن يا اسفااااه اخدها المدرب الاجنبي وصار له قيمة في بلده وعيشوا كتييييير تشوفوا كتيييييير.
هرجة:
المصالح الشخصية والواسطة وملايين الريالات اللي بيستلمها لعيبة ما يستاهلوها هية دي اللي دمرت الكورة في بلدي.
abofatoo@hotmail.com