أصابع الزمن

ماجيت ازايد على جرحي وانا ادري به
جيت انهي القلب مير القلب مايوحي
اكتب قصيدي على لحني واغني به
واصابع الوقت تكتبني ولاتمحي
غريب والعمر كله صار تغريبه
غريب ماتعرف العالم سوى جرحي
من كثر ماخان هذا الوقت ترتيبه
تعلقت مفرداته وجهي السمحي
الليل غيب عيوني في غياهيبه
وانا انتظر فزعتك بالنور ياصبحي
اوثقت (شيطان روحي) من تلابيبه
وجودته بطعنتين وخانني رمحي
والسيره اللي غشاها الشك والريبه
مزوحها جدها والجد من مزحي
مديت بالود جسر وجسر من طيبه
لاحبابي اللي تناسو زادي وملحي
وباشرتهم بالتمر والنخل يزهي به
من حلوة الجوف والا نخلة البرحي
واشركت من حس بابهامه خلا جيبه
في راس مالي وفي عيدي وفي ربحي
لكن في شيمة اهل العز والهيبه
بعض المواقف ابد ماتقبل الدمحي
عن منطق اهل الخنا والعيب والخيبه
اهون عليه من (احساس القهر) ذبحي
واليوم ياهاجسي لحن تلالي به
يرقى (صروح الوفا) لو ينهدم صرحي
لو تاخذ القلب يالهاجس وتسري به
ماينفقد قلب لكن ينفقد جرحي