أحبابنا .. سافروا فينا

مال الهوى في غصون العشق ياسوسنة
مدي جروحك على قلبي وأبيها تهيم
وحيد أنا والشقا عنك أقدر أستوطنه
وأنتي عذابك حرام إنه بعينك يقيم
هو صوتك إللي يصحيني من الأمكنة
يملا الفراغ بحياتي وأنكسر وأستقيم
وشوفني شي له معنى وله أزمنة
يشوفها عقب ماترحل عيونك سديم
أنت الهوى إللي أعرفه بس ما اتقنه
الله يا أنت حضورك كم بسيط وعظيم
الموت طفل وبأحضان الغلا نحضنه
وأحبابنا سافروا فينا كذا من قديم
ضحكاتهم دمعنا أللي عقبهم نثخنه
ياما انتلاشى وننحاز لعيون الهشيم
والريح سودا متى يصحي الأمل تهدنه
ومن تحتنا الأرض جردا والليالي /عتيم
يومي من الحزن هارب مالقى مزبنه
جيت اتتخي في عيونك ظفني ... ياكريم
مليت سخف الحياة وسالفه مزمنة
وطاحونة العمر تطحنا وهم سقيم
والراس إلي بالكفوف المتعبة ندفنه
والشوف إلي مايشوف الأجدار بهيم
عجزت من كثر مامليت منه أركنه
ياماركني على الهم وغدى لي خصيم
لو الزمن ينصف المحزون ما أمكنه
يحطني قرب عينك وانتشي بك وأهيم
وأصير لك عمر مهما غيبتك تطعنه
يقرا المواجع وياقف عند وجهك كظيم
والعمر ابنسى تفاصيله وأعيش أحسنه
أرمي عيونك على روحي وأبيها تهيم
إيه اضحكي توعاد الحب في موطنه
إيه اضحكي توني حسيت قلبي سليم
إيه اضحكي تضحك الأيام ياسوسنة
ماعاد باقي سوى جرحك بقلبي يتيم.