بائع الثلج

كتابة السر بالأوراق مثل الجهر..
بعض الورق (مشكلة).. يمل حتى الجيوب..
الليل ليلي وانا (صالح).. زبون السهر..
ماجت على الضيقة اللي قبل وقت الغروب..
أنا / أنا للحزن على حدود القهر..
أنا / أنا للهلاك.. (استغفر الله واتوب)..!
كني فقيرٍ يبيع الثلج وقت الظهر..
ويشوف قدام عينه راس ماله يذوب..!!
إن قلت: هذا الدهر.. بقول: (هذا الدهر)..
وان قلت: ما هو صحيح.. أقول: وقتي كذوب..
تدري..! مادام انت ياحظي مصب النهر..
بزرع من الحلم قطره للعطش وسط كوب..!
وبصوم يومين.. عشر ايام.. والا شهر..
وبفطر على الموت.. ياضاقت علي الدروب..
بموت ما احتجت.. والحاجة تقص الظهر..
وبعيش لو ما ملكت إلا عمامه وثوب..
يغنيني الغيم ياسولف علي الطهر..
وانا معه وأتساقط من عيون الذنوب..
يطيح حظي ولا أرميه رمي (الزهر)..
فيني حسن كثر ما الله حط فيني عيوب..
الليل مظلوم لو كله (ثقافة عهر)..
رسم سواده على وجه الليالي شحوب..
ياليل خلك معي.. ياشمعدان انصهر..
ياحزن رح .. مابقالك غير (ليلة هروب)..!
صالح السهلي