ملح وأهداب

للسالفه في داخلي ملح وأهداب
كتمتها واحتجت أسولف لعمري
بالذاكره عاشوا محبين وأغراب
يتقاسمون عروق بالي وصدري
هزيتهم ليله وطاحوا لي عتاب
واستكتبوني بيت ماكان يطري
أنا كسبت الشعر من فقد أحباب
وآنا فقدت احباب باسباب شعري
وأللي جرحني قبل عامين بغياب
ماغاب وأنفاسه إلى اليوم عطري
يمرني وأفتحله القلب والباب
وارتله تنهيده بصوت حبري
وألبس خدودي من الدمع جلباب
وآعري البسمة على وجه ثغري
عامين دمي دم وأعصابي أعصاب
الله ياضيقي وياوسع صبري.
تركي الأسمري