القصيدة الملقاة أمام الملك سلمان

تحية الامجاد من دار الامجاد** برّاقها ينْوِر ويرزم رعَدها
ديمة وفا تمطر معزّة وتزداد*** جادت غلا في غيثها مع برَدها
من السالمي لين النويصيب تنقاد*** وللعبدلي مع فيلكه في مددها
في جية اللي شوفته عيد الاعياد** وجه الأمل للمسلمين وسعَدها
وِرثة معزي من صنَع مجد وبلاد** اللي عْدود العز ثار وورَدها
بالسيف والحكمه على المملكة ساد** صارت عرينٍ له وهو صار اسدها
سلمان سلمان العرب عنّهم ذاد*** هذا المليك اللي للامّة سندها
يوم انتخت فيه اليمن تشكي الكاد*** فزع لها سلمان وامّن ولدها
قال ابشري مهما الثمن كلّف وزاد*** حتى تموت شرورهم في مهدها
ياخادم البيتين ياذراع الانجاد*** تاهت على غيرك وراسك وجدها
مجد الصحابة فيك يرجع وينعاد***لك جيرةٍ تشهد ولحدن جحدها
وان كانها بحساب كثره وتعداد***مليار مسلم كلمتك يعتمدها
وان كانها بجيوش وسلاح وعْتاد***النار نجعلها على من وقدها
انت الذخيرة للخطيرة والامداد** وحنا الحَرَار اللي ينومس هدَدها
ريح الفشق بخشومنا كنه قْناد*** طموحنا الجنة ولذّة شَهَدها
إيدٍ على المصحف وإيدٍ على زناد*** وروس الفتن باذن الكريم نْحَصدها
يقودنا شيخٍ له القمة شْداد*** صباح الاحمد والمعاني فرَدها
حكمة وحنكة مالها حد واعداد*** تبقى إلى مالا نهاية أمدها
أمير الانسانية الليّن الجاد***كلْ نايفة شيخ المكارم صعدها
اليا زعل لاعداه سمٍ بالاكباد***واليا رضي غيث النفوس ورغَدها
يداوي الروس العنيدات بعناد*** الين ماتخضع وتخلف وعَدها
على الصعيبات الكليفات معتاد*** وحده يحلّ حْبالها ويْعَقدها
بصيرة اجدادٍ ونبراس لاحفاد*** قصة كفاحٍ مايوقف عددها
له معضلات الارض تُعسَف اذا راد*** رادار ابو ناصر بلمحة رصدها
ياكوكبين العز في امة الضاد*** مليك حزم وشيخ حكمة شددها
خيمة خليج العز كلٍ بها شاد*** اطنابها شِدّت وقامت عَمَدها
ترى الهدف ما يقتله كل صياد*** ولا كل من يبغى الثمينه وجدها
والمهرة اللي للميادين تعتاد*** تعرف وزن خيّالها لا لِكَدها
والعود ما يكسر معَ حزمة اعواد**ياويل من سارت بعزلة وَحَدْها
تصبح فريسة غدر طامع وحسّاد*** اما خذاها صبح ولا هجدها
واليوم نعلنها على روس الاشهاد** قمة اخوة بالكويت نْعَقِدها
منها على التاريخ مصدر وميراد*** سيرة مراجل تتعب اللي سردها
ال الصباح لغيرهم خيرهم زاد*** اعمالهم بالطيب كلٍ حَمَدها
و آل السعود حشام و كرام واجواد*** السيرة اللي ينذهل من شهدها
و آل الصباح شيوخ تاريخ وامجاد*** اسرة فخر محدٍ قدر يضطهدها
و آل السعود لدين الاسلام الاوتاد*** شرفهم اللي باسط ارض ومهدها
اخوان نورة بالوفا سقم الاوغاد*** واخوان مريم ماتهنت ضْدَدها
العزم واحد والاصل نفس الاجداد*** من صلب وايل والعلوم اعتمدها
من حظنا صرنا لهم شعب وبلاد*** حكامنا لا شك يدنا بيدها
والله مانخلف لهم اي ميعاد*** حتى تموت الحاسدين بحسدها
عهد الوفا منا جماعات وافراد*** وحنا الرجال اللي توفّي عَهَدها
ومن لا يترجم قوله بفعل واوكاد*** كلمتك كل اللي سمعها نِقَدها
والشاعر اللي للجزيلات قصّاد** انتم وسام ابياته اللي قِصْدها