إستهتار بعض محطات الوقود والضحيه أنا وأنت ..

سامي عبدالله ( صريح لا للمجامله ) :
السلام عليكم ورحمة الله وبركاته
احلى صباح لاحلى مدينه ومن سكنها
انا مواطن من سكان هذي المدينه وما اخفيكم صراحه انا
مرتاح فيها كثير بوجود حاجات كثيره
تفتح النفس - تسنه يدق .. المهم
بس في الاخير الخرج هي مدينتي الاولى ...
السالفه ومافيها قبل يومين قدر الله علي وانا امشي
بسيارتي لالي ولا علي توني شاريها وفرحان فيها
ومن كثر خوفي عليها اذا جيت الف ادق اشاره
قبل اللفه ب 200 متر تخبرون السواقه عندنا الله بالخير
المهم لفيت ودخلت محطة البنزين طفيت السياره قلت
للعامل عبي بنزين اخضر ب 30 ريال عبينا ومشينا
تعديت المحطه بإشارتين الا والموتر قام ( يتفتف ) وقفت
من الخوف وطفيته رجعت اشغل وابي امشي في هالشموس
الا والسياره تقول وقف هذا محلي معاد مشت مالي شهر
شاريها جبنا سطحه وشلناها للصناعيه وكهربائي طبعا
معروف بالخرج انصدمت لما قالي من وين معبي بنزين
قلت ليش قالي انت معبي ( مويه ) شكلك فكرت انه يمزح
محطه معروفه على مستوى الخرج مستحيل قال تعال شوف
اجي الا والله كلامه صدق خذيت عينه من ( التانكي ) ورجعت
للمحطه قلت اتأكد يمكن سيارتي فيها شي وبالصدفه
سبحان الله حصلت ( وايت ) بنزين توه موقف جاي من المصفاة
جاني مسؤول المحطه وقلت لو سمحت ابي عينه وخذيت
ورجعت لمكينه البنزين وخذيت طلعت ثلاث عينات معي بنزين
الوايت + تانكي سيارتي + مكينه البنزين = .. مويه ..
بس ريحة بنزين فيه واللون يختلف خفيف مره ماخبره كذا انا
مسؤول المحطه مصري الجنسيه قلت إيه رأيك دنا من ساعه
معبي عندك قالي ايوه بعرفك .. قلت ابي اعرف السالفه
مارد علي الضحيه الهندي مسكين ( حشرته ) في مكينه
البنزين واعترفقال اخر رد وايت عبيناه من حرض قلت يعني
مو من مصفاة الرياض قالي لا قلت طلعلي صاحب المحطه
المهم جاني ويشوف العينات يقولي بكل برود
مافيه الا انت مشتكي قلت لا معي واحد اثنين بس حنا والهندي
عاملكم شاهد والمصري فاتح خشته مايقدر يتكلم لان كل شي
واضح قدامهم قلت من يعوضني سيارتي الحين انت او الهندي
قال ماعندي لك شي قلت فيه شرطه باخذ العينات وبروح
قالي رح بلغ ( معروف بالخرج وعنده واسطه )
وللأسف صاحبها موظف في بلديه الخرج يعني اخر شي يفكر
فيه الشكوى اللي بقدمها وانا المواطن المسكين اطارد ورى
سيارتي اصلحها وكلفت علي فوق 2000 ريال
وين الامانه والذمه في التجاره فأنا بما اني مواطن واخاف
على غيري من هالاشكال حبيت اقولكم هالمحطه اتمنى
محد يعبي منها حرام يطيح فيه راعي سياره جديده ويروح
فيها وماقلت لكم عشاني حاقد او شي اخاف البعض يفكر
كذا انا تركتها لله سبحانه هو اللي بحاسبه يكفي دعوتي
بكل صلاة عليه .. المحطه ..... امتداد طريق
الثليماء قبل اشاره ..... واتمنى من ادارة
الصحيفه انها ماتحجب الاسم للامانه وللذمه خلو الكل يعرف
انو هالمحطه تشتغل بلا ذمه وضمير والضحيه حنا قسم بالله
الله سبحانه ورسوله مايرضون هالشي واتمنى يااداره
الصحيفه انكم ماترضونها علينا ..
ونسيت اقولكم على مكافحة الغش والتجاره اتصلت عليهم
واذا جدار غرفتي يسمعني فهم سمعوني شي مضحك صراحه
قبل فتره مزعجينا في برنامج 99 ودقو واتصلو اذا شفتو
شي من هالقبيل ووقتها تذكرت مقوله جدي الله يرحمه
يقولي ( الحتسي زوين لكن الفعل مهناش ) هههههه
موضوعي في ذمة الصحيفه تنزله كامل بدون حذف اسم
المحطه ولي رجعه على الموضوع والنقاش ....
تحياتي للجميع