زَرقة رمح! وإلا ركض خيل!!!

الليالي، والعناء، والحزن، والصبر الجميل
...........والسهر ، وابيات شعري ،والزمان وماحواه
والهقاوي ،والتعب لااطريت لي دربٍ طويل
...........والعزاوي،والمناوي،والخفوق وماوراه
واليتم مع فقدة الغالين حزات الرحيل
..........والدموع وحيرة الاقدام، والحلم وشقاه
والرفاقه لحظة الميقاف، والمال القليل
..........والمجالس، والظروف القشر ،وادروس الحياه
كلبوها علمتني ويش معنى المستحيل
...........بإني احمّل على قلبي بشيٍ ماقواه
واتحلى بالصبر لوهو عذاب وطول ليل
............عادتٍ تبقى بقلبي ياصوابي ياخطاه
مستحيل اترك ظلال الصبر لو مابه مقيل
...........ومستحيل اخون عهد الروح لو غيري رضاه
ومستحيل اعّن خيل الطيب لو ماهو بأصيل
...........ومستحيل امشي طريق العيب واتجرع خزاه
ومستحيل اكون لو لحظات مع شخصٍ ذليل
.........ومستحيل ، ومستحيل ، ومستحيل، وآه، آه
آه مايقهرك غير إن الكرم عوّد بخيل
...........شح به وقته وهذا البخْل ملعونٍ ثواه
واه ياشعري وفلسفتي على البْحر الطويل
.............عذّبت تيار فكري لين عدّا مستتواه
ياجنون الشعر: زَرقة رمح! وإلا ركض خيل
...........يسري الفارس على فاله ولو طاحت عصاه
شايلٍ همه ورا قلبه وللصعبه يشيل
...........والغياب إللي بدون اسباب من خله طواه
لاح برق الخير فعيونه بعد طلعة سهيل
............بس لابرقٍ قرب عنده ولايسقيه ماه
ياوجوده وجد شيخٍ شايبٍ جسمه نحيل
............تأكل الامراض بأطرافه ومذخوره إعصَاه
قفّت الايام بالماضي ولافي يديه حيل
............غير رجم الهم من همه ومن حزنه رقاااه
ياوجوده مثل وجده يادوا قلبٍ عليل
............لاتذكّر ماتذكّر ردْ همه في حشاه
مازن العوني
mazen02m@hotmail.com