لو مش عايز تنزل.. اطلع!

المصري اليوم - القاهرة
طبعا إنت يا حمادة زمانك زهقت.. كل الناس والسياسيين والكتاب والإعلاميين عمالين يقولولك تنزل.. انزل إدى صوتك.. انزل انتخب.. انزل انزل انزل لحد ما ركبولك الخفيف!.. ماشى يا سيدى، بلاش أقولك انزل.. اطلع!.. اطلع من بيتك يا حمادة وروح انتخب.. اطلع جدع يا حمادة مرة واحدة على سبيل التغيير وروح انتخب.. أصلك مش فاهم.. مهم قوى فى هذه الانتخابات بالذات إنك «تطلع» ونشوفك وناخذ مقاساتك.. طولك وعرضك وحردة الوسط.. مهم قوى إن العالم الخارجى يعرف مقاساتك.. ويعرف إنك إكسترا لارج.. كما أنك لو حسبتها جيدا، فستجد إنك كده كده فى جميع الحالات ما ينفعش تقعد فى البيت..
لو إنت من مؤيدى المشير السيسى، فلا بد أن تشارك فى صنع فرحتنا به.. أما لو إنت من مؤيدى الأستاذ حمدين فأمامك طريق من اتنين، إما أنك تثق فى نجاحه، وبالتالى لا بد أن تشارك فى صنع فرحته، وإما أنك يئست بعد نتيجة المصريين فى الخارج، وهنا لا بد أن تدلى بصوتك أيضا حتى تعطيه هزيمة مشرفة، فيصبح الفارق بينه وبين المشير السيسى ضئيلا.. أما بقى لو سيادتك مش عاجبك لا المشير السيسى ولا الأستاذ حمدين، فتصدق إنك برضه ما ينفعش تقاطع؟.. لأنك فى هذه الحالة لا بد من ذهابك اللجنة وتبطل صوتك علشان تنكد على الاتنين.. السيسى وحمدين...
تروح تستمتع كده بإنك بتبوظ الورقة بإيدك، بعرق جبينك.. وخلى بالك حتى إبطال الصوت دليل على المعارضة.. أما بقى لو سيادتك من أصحاب الطلبات الفئوية، فهذا أدعى إنك «تطلع» من بيتك وتروح تصوت حتى يصبح لك بعد ذلك الحق فى المطالبة بحقك.. إنما إنت لو قاطعت هتطالب بحقك بعد كده بأمارة إيه؟.. وهنا لا بد أن أقترح على الحكومة إنها تعمل حركة معيلة، وأن تلجأ لدفاتر الانتخابات حين النظر فى المطالب الفئوية، فلا يلتفت لطلبات المقاطعين.. هل تعتقد أن هذا تعسف؟.. ألا تعلم أنه إذا لم تكن لبلدك والزمان شرم برم، فلا خير لك منها والزمان ترالالى؟.. والذى لا يقف بجوار البلد فى أزمتها فلماذا إذن تقف البلد بجواره فى أزمته؟.. أما بقى لو سيادتك لن تذهب للانتخابات، لأنك ترى إنها مسرحية كما يتفزلك المتفزلكون، يبقى هذا أدعى أنك لازم تذهب وتبطل صوتك حتى تسجل اعتراضك هذا.. ثم إنت يعنى تكره إنك تمثل وتبقى زميل لرشدى أباظة ولا سعاد حسنى؟ يا عم رووووح!!
.. أما لو ظللت بالمنزل، فهذا أبلغ دليل على أنك توافق على المسرحية، فجلست تشاهدها!.. ممكن برضه يكون عدم ذهابك سببه الكسل.. طيب ألا تعلم أضرار الكسل على القلب والرئتين والدورة الدموية؟.. روح يا راجل مشى رجليك شوية، إنت كسَّحت ولَّا إيه؟!.. ده اللى أدك بيتجوزوا تانى!.. ثم إن الهوا عند اللجنة يرد الروح.. ماذا أيضا يمنعك عن النزول؟ مزاجك مش رايق؟.. طب بقالك أد إيه ما فسحتش المدام؟.. لماذا لا تأخذها وإيدكم فى إيد بعض وتروحوا على اللجنة عصفورين حلوين صو صو صو؟ هو فيه فسحة أجمل من كده؟ إنت ما سمعتش اللجان عاملة إزاى؟..طبل وزمر ورقص وأغانى وحاجة ساقعة وساندوتشات.. فاكر إنت ذرة الثورة بتاع الميدان؟ عند اللجنة ستجد ذرة السيسى وبطاطة حمدين وترمس الأصوات الباطلة!.. يا راجل قوم بلاش كسل روح انتخب وفرفش وفك عن نفسك شوية...
أما أنتم يا من تصرون إن صوتكم مش هيفرق، الله يخرب بيت اللى علمكم القراءة والكتابة!!