أبشر يا ملكنا

لا إله إلا الله اللي له سجدنا
واحدٍ ماخاب مخلوق لجى به
به حربنا واستجرنا واستعنا
واعتصمنا به وحكمنا كتابه
بعد هذا ياوطن حنا وحنا
نلطم العايل ولا يهنأ شرابه
بلغوا العدوان واعطوهم خبرنا
عن تمام الحج والعلم وصوابه
واخبروهم ياوجوه الخير عنا
كلنا «سلمان» في سلم وحرابه
كلنا فدوة ترابك ياوطنا
مملكتنا في حمى بشت المهابه
في ذرى سلمان يازبن المجنا
وقفته خلت عدوه في رهابه
و«ابن سلمان» المظفر لا ذكرنا
كل مسلم يحتفي حضرة جنابه
لادعانا قائد الأمه حضرنا
نحتسي للحرب ماحن ابغلابه
الجنود الوافيه منا ومنا
يشربون الموت مافيها غرابه
حن هل الوقفات والسيف المحنا
حن حماة الحد وعيون الذيابه
جيشنا لاغار حققنا هدفنا
والعدو يذعن ويعلن بانسحابه
صفنا واحد ولا بيوم أنثلمنا
انشد التاريخ يامن هو قرابه
يا البلاد الغاليه يا مملكتنا
مهبط الوحي الندي دار الصحابه
والحقايق يخبرك يامن جهلنا
الوطن من يقصده يلقى عقابه
والسلام اختام وابشر ياملكنا
والله اناّ محزمك في كل نابه