أوراق الخريف

يا رفيقي طيب النفس والقلب النظيف
لا تغرك بعض الاشوار واسمع كلما
قلت لك حاجة قبل تسقط اوراق الخريف
ضمها عن ضايع الراي والفكر العما
صعب جداً تلحق الناس بالعزم الضعيف
خل عينك دايم ٍ فوووق ..والهمه سما
صافح كفوف الهقاوي على الضلع المنيف
واحتزم في حبل الافكار وإقرب للحما
المراجل ما تبي كثر هرج وبرق صيف
مهرة خيالها الفعل واوجاع الجما
كان حدك جاير الوقت لا حدود الرصيف
حاول انك تاخذ من الزمن درس علما
لين برق العز من فوق يبداله رفيف
والسحاب اللي تزّبر تقفاه دهما
ينتثر غيثٍ على النفس يجلى كل حيف
ترتوي منه المعاطيش ويروح الضما
يا رفيقي وانت بالقلب لك عندي مضيف
ما يغير كبر قدرك غلا هند ولما
صاحبك ما رافق الطير أبو ريشٍ خفيف
حيد عزٍ كل ما تعتزي باسمه زما
كان ما زاحم على الاوله عاف الوصيف
بالنوايا البيض مثل السحاب اليا هما
وانت خلك فوق ظنه على المجد الكليف
الحياة دروس واحلام الايام نهما
الفقير احيان ما تقنعه كسرة رغيف
والغني ما ياصل المجد لو ماله نما
القناعة كنز الاجواد والقلب النظيف
دوم يرقا للمعالي وعينه للسما