كيف راحت؟!

المطار اللي رسم .. وجه المسافر
يختلف في ناس جات وناس راحت
الحزن، وجه الموادع .. لو يكابر
الملامح .. كلما نخفيه باحت
كيف نخفي وانت قلبك كان ذاخر
حب واحساس ومشاعر، ليه طاحت
جيتني نعمه .. وانا لله شاكر
شفت نفسي فيك والعين استراحت
كنت أشوفك في ملامح كل عابر
فالأماكن فالسحاب إن كان ساحت
كنت اشوفك يالملاك .. بقلب طاهر
لين مانفسك عصتني واستباحت
انهكتني وانهكت صوت الحناجر
خلصت ذيك الحكاوي شوف باحت
صرت اشوفك بس في طاري المقابر
ذكرياتك غابره .. معاد فاحت
صاحبي والوصل لامن صار عاقر
كيف ابوصف موقفي والعين شاحت
انت صابر .. بس انا ماني بصابر
كل نبضه في خفوقي منك ناحت
لاجل ابنسى شوفني دايم مسافر
بس طريا الجرح مدري ليه صاحت
البعد وجهٍ كئيب .. وقلب كافر
وانت فرصه ماتعوض، كيف راحت؟!