عالم الأحلام

قال منهو عالم الأحلام غرّه
عاش فيه وضاعت احلامه خساره
يوم راجعها لقاها ماتسرّه
ليت والأحلام ماتبني عماره
ماتساوي كلها مثقال ذرّه
لاصحى النايم على تالي نهاره
كنت احسب اني تجاوزت المجرّه
مثل نجمٍ له فضاه وله مداره
العواصف والزوابع ماتمرّه
مستحيل تجيه وتغير مساره
لين جاني واعظٍ لله درّه
ذاع صيته من نباه ومن وقاره
عود ذاق من الزمن خيره وشرّه
كل كلمه منه تكفي عن عباره
قال وين اللي يقول النفس حرّه
يالبيب إن كان تكفيك الإشاره
القلوب اطفال والعثرات مُرّه
تطرحك في بير ماتعرف قراره
الهوى دربٍ يودي في مغرّه
لاتمادى فيه من دون إستشاره
وإن طرت لك حاجةٍ فيها مسرّه
قبلها صلي صلاة الإستخاره
الحلا في معظم انواعه مضرّه
والدوى ينفع وهو فيه المراره
معظم احلامك تراها صيد حرّه
حرةٍ قشرا حجاره في حجاره
إن توارى عنك ماحصلت جرّه
وإن بدالك مارميته رمي شاره
الحياه جهاد كرّه بعد كرّه
معركه يبغالها عزم وجساره
منت قادر تنتصر في كل مرّه
لو معك قوه ولو عندك شطاره
إن هزمك الوقت لاتقعد تشرّه
وإن هزمته خل فوزك عن جداره