ودعتك الله

عز الله إني كرهتك لو تحبيني
.... .... والحر ما يخدعه زينة حواجبها
اعز نفسي عن اللي ما يدانيني
.... .... وأرفع مقامي عن الهفوات وأشذ بها
على دروب الهدى يالله تهديني
.... .... وأهل الشيم يالله انك ما تخيبها
ياهاجسي الكايدة ماهي تعنيني
.... .... نفسي تبي العز والعليا مطالبها
مرة تصيب الهدف وأمرار تخطيني
.... .... ما يعلم الغيب كون اللي يراقبها
منك العوض يا إلهي وأنت محبيني
.... .... لا خاب ظن الفتى باقرب قرايبها
ترى الجمايل لها ناس محبيني
.... .... وما كل رجل تعلى في مراقبها
والله ما داني الردي والفسل والشيني
.... .... والنفس ما تقبل اللي ما يليق بها
دار بها الحقد والله ما تسليني
.... .... ولاني بندمان لا فارقت صاحبها
أندم على فقد غالي كان يعنيني
.... .... اللي يشيل الحمول ولا يذيع بها
دنيا غرورة تقلب بالموازيني
.... .... ولابد ما تكشف الدنيا غرايبها
امشي مع اللي على العليا يقديني
.... .... وقدر الرجاجيل عند اللي مجربها
ويادار ودعتك الله لو هجرتيني
.... .... يا مسقط الراس يا أغلى حبايبها
ويا دار مجفاك لو إنك جفيتيني
.... .... غصب علي حب ربعي في نوايبها