يا الله عفوك نهار العرض والمحشر

يا نشوة الفكر خلي شاعر المهجر
يمسي على خير بالله لا تسرينه
وأن كان همك بروز وزايف المظهر
عني تنحي شموخ الشعر ما هينه
أليا نويت القصيد وهاجسي عبر
عديت ضلع قليل اللي معدينه
وسميت باسم الله المعبود ثم أدبر
شعر قبل ما أذكره تغوي شياطينه
الشعر جسر الوصال وسكة المعبر
لهموم صدري نوى يطلق مساجينه
ولا كل همّ على سمع الملا يذكر
بعض المكاتيب يفهم من عناوينه
والعاشق اللي يهيم بدنيته مغتر
ما يدري أن الزمان إفناء سلاطينه
ومصير الإنسان مهما اغتر واتكبر
يرجع إلى أصله وأصل العبد من طينه
ويا الله عفوك نهار العرض والمحشر
ولطفك بعبدك اليا خفت موازينه
وتجزيه يا سامع المحتاج والمضطر
روض تغنى طيوره في بساتينه
ويا نشوة الفكر خلي شاعر المهجر
يسمي على خير لا يطلق مساجينه
نهيان السدر الحمادي