كل عامٍ وأنت يابلادي بسعد

نشكر الله عدِّ من صلَّى وصام
جلِّ ربًّ قادرٍ فردٍ صمد
خصنا في بلادنا دون الأنام
بالمشاعر وجهة اللي له قصد
كل عامٍ وانت يابلادي سلام
كل عامٍ وانت يابلادي بسعد
يا بلد كلٍّ يقدرك احترام
يا بلد جعلك عمارٍ للأبد
يرحم الله من على الحقِّ استقام
علِّ روحه تهتني وسط اللحد
شيد البنيان والدوله أقام
جاهد وكافح لجل يبني البلد
يا بلادي في سماك العز حام
ولَّت سنين التعاسه والنكد
بعد ثاراتٍ وفرقه وانتقام
صار كل الشعب روحٍ في جسد
وبعد حال الفقر وبيوت الخيام
وقلة في الماء نتج عنها عقد
اهتنينا بالقصور أمِّ الرخام
ونشرب الماء سلسبيلٍ كالشهد
وبعد أميه وجهلٍ كالظلام
اعتلت بالعلم دور بلا عمد
والدواء وِفِّر لمن عانى السقام
وطاب نومه بعد ما اضناه السهد
واضحت الأيام وردٍ وابتسام
والرخاء أمطر بلا برق و رعد
وحدةٍ مع ألفةٍ فيها انسجام
ما ذهب جهدٍ لبو تركي بدد
كم دعي لمعزيٍّ وقت القيام
والثناء كله من العالم حصد
بعد عين معزي الشهم الهمام
واصل الأمجاد أشبال الأسد
اتبعوا دربه ونهجه بالتمام
بالولد أنعم ونعم اللي وَلَد
قادها سعودٍ على خط الإمام
بعده الفيصل صدق باللي وعد
واستلم خالد كريمٍ من كرام
بعده الملهم أبوفيصل فهد
من تولى الأمر واستلم الزمام
عن مصالح شعبه أبدًا ما قعد
عل يغشى قبورهم وبل الغمام
ويحفظ الله قايدٍ نجمه صعد
سادس الحكام له قدر ومقام
زاخرٍ عهده بكلِّ أمر رشد
سار بالدوله حثيثٍ للأمام
نهضه وتطوير في أقصر مدد
مرت الأعوام عامٍ بعد عام
ما يضاهى عهد عبدالله أبد
جابر الكسرات في الليل العتام
صار كفه للضِّعَيِّف معتضد
كم سقى العدوان من سم زؤام
والصديق أكرمه يوم إنه وفد
ساهرٍ ليله لشعبه ما ينام
يوم كلٍّ في فراشه قد رقد
يعمل بصمتٍ ولا يحب الكلام
كلِّ مشروعٍ على إنجازه شهد
اعتنى بطيبه مع البيت الحرام
كم بذل فيها بلا حساب وعدد
يشهد المسعى وما حول المقام
ويشهد الزاير ومن طاف وسجد
وانسياب الرمي من بعد الزحام
وكلِّ مشعر به إضافاتٍ جدد
ومسجد الهادي عليه أفضل سلام
ما ذخر عَنّه أبو متعب جهد
وأوقف الأوقاف خيرٍ مستدام
لجل ذلك كم ملايينٍ رصد
خصِّ للمرأه مشاريعٍ جسام
جامعة نوره مِثل عَمَّا ورد
مع تحلِّي بنت داري باحتشام
شاركت في التنميه وابدت جلد
ومع تمسكها بدينٍ والتزام
ارفضت دعوات من يبغى الفسد
ومجلس الشورى تشرف بانضمام
ماجداتٍ رايهن راجح يِعَد
ما بخسنا حقِّ لابست اللثام
رغم كذب المغرضين بها الصدد
من أبو متعب لقينا الاهتمام
الأمن وارف وعيشتنا رغد
مارضى للعرب تقهر أو تضام
لجلهم أعطى ونافح وانتقد
مانسى المنكوب في شرقٍ وشام
ولا نسى مسلم بأرضٍ مضطهد
مدِّ للإنسان جسرٍ من وئام
كلِّ نبعٍ للفضيله له ورد
نال كل المجد أطراف وسنام
سيرته منها دروسٍ تستَمَد
الشعب كله بحبه مستهام
شيب مع شبان واطفالٍ بعد
معه أخوه الفارس الحر القطام
عاش سلمانٍ لبو متعب سند
يا بلد حكمك فريدٍ في النظام
من كتاب الله وشرعه معتمد
رايتك فيها الشهاده والحسام
ما تنكس لو بكى العالم كمد
يا بلد غالي ولا يمكن تسام
كلنا لجلك سيوف بلا غمد
خدمة البيتين يا بلادي وسام
ما ينافسنا بها النعمه أحد
كم غريبٍ طاب له بأرضك مقام
صرت محبوبه وفي بلاده زهد
ما يسرك يا بلد غاض اللئام
والموده ما تجي مِمَّن حسد
كل ما يضرك لهم غاية مرام
نارهم صارت على ربوعك برد
قصدهم تبديد شملٍ وانقسام
أهلك الله من إلى فتنه حشد
من دعا لفوضى وما يسمى اعتصام
خاب ظنه مالقى بصفه أحد
مع قيادتنا يميزنا التحام
وما نطيع اللي على بلادي حقد
يا بلد أنت الهوى وأنت الغرام
منكر خيرك بعيونه رمد
والحمد لله هو مسك الختام
يجزل الخيرات للي له حمد
ناصر بن جمعان آل عوض
/ وادي الدواسر